993
Дулаахан гал гуламтатай гэр бүлэ бүхы дэлхэйе багтаахагэдэг. Аяар 44 жэл сугтаа ажана амгалан ажаһууһан Батор Цыренович ба Вера Ринчиндоржиевна Чимитдоржиевтанай гэр бүлын түүхэ эдэ үгэнүүдэй удха тайлбарилна. Сугтаа иимэ удаан ажаһууха гээшэ – ехэ жаргалшье, орёо “ажалшье”. Ажабайдалайнь утын замда дайралдаһан бүхы дабаануудые эбтэйгээр гаталһан, баяр жаргалаа, бэрхэшээлнүүдээ адли хубаалдажа ябаһан эдэ хоёр хуби заяамнай бидэниие ниилүүлээ, бэе бэеэ зүб олообди гэжэ тоолодог юм.
... 1973 он. Залуу, үсэд нэтэрүү Батор хүбүүн Буряадай Хүдөө ажахын дээдэ һургуулиин удаа Һүдэнтын Ждановай нэрэмжэтэ колхоздо малай аргашанаар һая хүдэлжэ эхилээд байхадаа, тэрэ үедэ П.И.Чайковскиин нэрэмжэтэ хүгжэмэй училищиин оюутан ба “Байгал” театрай дуушан байһан дангина басаган Вера Будаевагай зүрхэ сэдьхэл эзэлүүдгүй буляаһан юм. Тэрэл жэлдээ залуушуул айл боложо, гоё һайхан түрэ хурим наяруулаа.
1982 ондо Чимитдоржиевтанай гэр бүлэ хоёр жаахан эхир басагадтаяа Буряадай Залуу мэргэжэлтэдэй майн пленумэй уряагаар ой тайгата Баунт зөөгөө бэлэй. Тэрэ гэһээр Баунтын шэрүүн дайда түрэл нютагынь боложо, Батор Цыренович Вера Ринчиндоржиевна хоёр мүнөөшье болотор тэндээ ажаһуудаг.
Нютагаархидтаа хүндэтэй гэр бүлэ буряад арадайнгаа ёһо заншал сахижа, түрэл хэлэеэ, соёлоо һэргээхэ, зоной дунда нэбтэрүүлхэ талаар горитой ажал ябуулдаг габьяатай. Гадна аймагайнгаа бүхы үйлэ хэрэгүүдһээ гээгдэдэггүй, хүн зон тэдэнһээ зүбшэл заабари һуража, һанамжыень асуужа байдаг. Тэдэ можо нютагууд хоорондын, уласай, аймагай бүхы хэмжээ ябуулгануудта хабаададаг: буряад хэлээр диктантһаа, “Алтаргана” нааданһаа эхилээд, Буряад Уласай 85 жэлэй ойн баярта, Буряадай Ородой гүрэнэй бүридэлдэ ороһоор 350 жэлэй ойдо зорюулагдаһан хэмжээ ябуулганууд хүрэтэр.
Батор Цыренович – дэлгэр сэдьхэлтэй, өөдэрхүү бэшэ, холые харадаг, мэдэлшын бэлигтэй, зоной түлөө бүхы зүрхэ сэдьхэлээрээ һанаагаа зободог хүн. Тэрэ олон жэлдэ аймагайнгаа нютагаархидай бүлгэмэй зүблэл толгойлһон. Вера Ринчиндоржиевна баһал зоной хүн юм. Урин налгай, хүндэмүүшэ, ирагуу гоё хоолойтой. Тэрэ “Сагаан Хада” гэһэн буряад арадай аман зохёолой бүлгэм байгуулһан, амжалта түгэс хүтэлбэрилһэн.
Эдэ хоёр ямаршье ажалһаа тунхарингүй, бүхы наһаараа түрэл нютагайнгаа аша туһада оролдожо ябаһан юм. Гэрыньшье дарагар гоё даа, наһанайнгаа амаралтада гараад, үмсын хамһабариин ажахы эрхилдэг. Зүгөөр тон шухалань гэхэдэ, уг гарбалаа мэдэдэг, ёһо заншалаа сахидаг, тоонто нютагтаа дуратай ёһотой үри хүүгэдые хүмүүжүүлээ.
Зүүн Сибириин соёл болон уралигай академидэ һураһан Оюна басаганиинь Бүхэроссиин үзэсхэлэнэй түбэй лауреадай медаляар, “Эрдэм оньһоной зохёохы ажалда амжалтануудай түлөө” медаляар шагнагдаһан, эвенк арадай арһан бүтээлнүүдые урлагша гэжэ суурханхай. Арюна басаганиинь – эмшэн, Улаан-Үдын СЭС-тэ хүдэлдэг.
Батор Цыренович Вера Ринчиндоржиевна хоёр мүнөө зургаан ашаяа хүмүүжүүлэлсэжэ, элинсэг хулинсагуудайнгаа һургаал заабари дамжууланхай: Бэлигма П.И.Чайковскиин нэрэмжэтэ колледж дүүргэнхэй, Бато – кадедүүдэй һургуулиин курсант, Анастасия - Улаан-Үдэдэ Мариинскэ һургуулиин һурагша, Сэсэгынь ганса табан дээрэ һурадаг, эхир хүбүүд Цыден ба Цырен хоёр – хүүгэдэй сэсэрлигэй хүмүүжэмэлнүүд.
Чимитдоржиевтан – гэр бүлын һайхан заншалнуудые сахидаг, арадайнгаа сэсэн һургаалнуудые хүндэлдэг, хүүгэдэйнгээ хүмүүжүүлгэдэ харюусалга ехэтэйгээр хандадаг эбтэй эетэй гэр бүлын эрхим жэшээ, нютаг зондоо хүндэтэй, нэрэ түрэтэй буряад арадай түлөөлэгшэд гээшэ.
Батор Цыренович Чимитдоржиев – ажалай ветеран, Буряад Уласай габьяата ветеринарна врач. Ородой Холбоото Уласай Хүдөө ажахын яаманай, Буряад Уласай Арадай Хуралай, Буряадай Соёлой яаманай Хүндэлэлэй грамотануудаар шагнагдаһан, “Буряад Уласай эрхим ветеринарнууд” гэһэн Хүндэлэлэй Номдо оруулагданхай.
Вера Ринчиндоржиевна Чимитдоржиева – ажалай ветеран, Буряад Уласай соёлой габьяата хүдэлмэрилэгшэ, Арадай уран бэлигэй бүхэсоюзна фестивалиин лауреат.
Ольга ЖИГМИТОВА, Баунтын аймаг
