869
«Эрэ хүн зориhондоо, эхэнэр хүн эсхэhэндээ» гэhэн урданай сэсэн мэргэн үгэнүүд имагтал оёдолшо, зүйдэлшэ басагадта хабаатай гээшэ ааб даа…
Урдандаа сагаан буурал толгойтой, hаншагаа бууралтажа сайhан үбгэд хүгшэднай худа урагуудай танилсалгын дугы бодхооходоо, бэри болохоёо байhан зулгы залуухан басагатай айлайда орожо танилсахадаа, иигэжэ хэлэдэг байгаа ха юм: « Танайда тобшо, шагта хадажа шадаха, тойробшо малгай оёжо шадаха басаган бии гэжэ дуулаабди»…
Харин минии бэшэhэн зураглал соо шэнэ маягай түхэлөөр хубсаhанай үльгэр зохёодог, элдэб моодын сэтгүүлтэй ханилдаг, уран гартай модельер-хэбшэн, хубсаhа зохёон бүтээгшэ (конструктор) Сэлэнгэ һайхан нютагайнгаа хүбүүн Игорь Сарапуловтай таанадаа танилсуулха hанаатайб.
Игорь 1977 ондо Вячеслав Иванович ба Нина Дашиевна Сарапуловтанай үнэр баян 5 үхибүүдтэй айлда түрэhэн юм. Балшар бага наhандаа нагаса эжыгээ дахажа, «Зингер» түхэлэй оёдолой хүлэй машинаарнь hонирхожо, дээрэ дороhоонь эхилээд хүдэлхэдэнь атаархажа, өөрөөшье hуугаад оёhойб гэжэ hанадаг байгаа. Хёрхо нюдэтэй, зээнэртээ дуратай, уран гартай оёдолшо Цырен-Ханда Дашиевна нагаса эжынь зээ хүбүүнэйнгээ уран бэлигыень обёоржо, «шэдитэ урлалай, оёдолой онсо нюуса таабаринуудтайнь» танилсуулха гэжэ шиидэбэ. Игорь тэрэ 90-ээд онуудай үе саг hанан, hанан дурсана. Автолавкаар унжагай ута, дулаан пуховигуудые наймаанда асардаг байгаа. Хүнүүд худалдажа абаад, үлүү гараhан хормойень таhалжа хайшалаад үмдэдэг hэн. Yлүү гараhан үртэhөөрнь өөрынгөө хэбээр, шэнэ моодын ёhоор эсхэжэ, элдэб гоё стильнэ малгайнуудые оёдог байгааб. Залуушуул ехэл дуратай абажа үмдэдэг байгаа гээшэ…
Һургуулияа дүүргэhээр 1994 ондо 6-дахи лицейдэ hуража, «эмэгтэйшүүлэй (эхэнэрнүүдэй) хүнгэн хубсаhа эсхэгшэ» гэhэн мэргэжэлтэн болобо. Уданшьегүй Сибириин Зүүн зүгэй гүрэнэй технологическа дээдэ hургуули 2005 ондо дүүргэжэ, оёдолшоной үйлэдбэри болбосоролой инженер гэhэн мэргэжэлэй диплом абаба.
Лицейн hүүлээр Северобайкальск хотодо «Элегант» гэжэ ательедэ оёдолшоноор хүдэлжэ эхилhэн юм. Улаан-Yдэеэ ерэжэ, «Лора - Мода» гэжэ ательедэ хүдэлhэн удхатай. 1999 ондо эгээл түрүүшынгээ амжалта туйлажа, «Мүнгэн зүү- 99» гэhэн мүрысөөндэ 2-дохи hуурида гараhан юм. Эндэ Игорь илажа гараhандаа ехэ омогорходог. 22-той залуу хүбүүн энэл мүрысөөнэй hүүлдэ зохёохы харгыгаа улам ехээр баяжуулаа, уран бэлигээ далижуулаа, сэдьхэлээ зоригжуулаа гэжэ бэшэхэдэ үлүү болохогүй. Тэрэ конкурсын hүүлдэ олон тоото фестиваль, мүрысөөнүүдтэ хабаадажа, амжалта туйлаhан юм. 2000 ондо түрүүшын хотын мүрысөөндэ «Хабарай гайхал» гэhэн номинацида илагшадай тоодо ороо hэн. 2002-2003 онуудта «Алтан манекен», «Байгалай арад зон» гэhэн фестивальнуудта «Эгээл эрхим хубсаhанай үльгэр зохёогшо», «Эгээл эрхим зохёогшодой суглуулбари» гэhэн номинацинуудта түрүүшын hуурида гараhан, «Залуу уран бэлигтэйшүүл» гэhэн лауреадай премидэ хүртэhэн байха. 2001 онhоо хойшо Гүрэнэй, Холбоото Уласай, нютаг можо хоорондын мүрысөөнүүдтэ «Эгээл эрхим хэб бүтээгшэ», «Шэнэ маягаар оёhон гоёлой хубсаhа», «Моодын сэтгүүлшэн» гэhэн фестивальда Москва хотодо дипломдо хүртэhэн. Красноярск, Шэтэ, Эрхүү, Воронеж, Томск хотонуудта үнгэрhэн фестиваль-мүрысөөнүүдтэ эдэбхитэйгээр хабаадажа, модельер-дизайнернуудай эгээл эрхим шатада илажа гараhан юм.
2010 ондо суута модельер Вячеслав Зайцевай шанда хүртэhэн байха. Монгол гүрэнэй Улаан-Баатарта 2012 ондо моодын фестивальда хабаадажа, диплом абаhан. 2016 ондо Монгол гүрэнэй Хүх хотодо үнгэрhэн «Бүгэдэ монголнуудай моода» фестивальда хабаадажа, шэнэ урлалаар зохёон бүтээhэн оёдол, хубсаhануудаа олоной hонирхолдо нюдэнэй шэмэг болгон харуулжа, диплом болон алтан статуэткэдэ хүртөө.
Һүүлэй табан жэлнүүдтэ Игорь Бүгэдэ Буряадай “Алтарганын” нааданда, Томск, Эрхүү хотонуудай хоорондо үнгэрдэг фестивальнуудта жюриин хүндэтэй гэшүүнээр hунгагдаhан байгаа. Олон зангүй, томоотой, өөрынгөө хэжэ байhан ажалые сэдьхэлэй уряагаар бүтээдэг хадаа, сугтаа хүдэлжэ байдаг нүхэдтөө hайшаагдадаг.
Өөрын зохёохы ательетэй болоhон хадаа, Игорь Вячеславович Буряад Уласайнгаа соёлой ажалда шадаха зэргээрээ туhалжа байдаг, залуушуулые дэмжэдэг юм. Өөрынгөө хэб үльгэрөөр зохёоhон, шэнэ маягаар оёhон хубсаhа хунараа олоной үзэсхэлэндэ дэлгээжэ харуулдаг. Хатарша, дууша хамтаралнуудта шэнэ хэбээр зохёоhон, тайзан дээрэ үмдэхэ хубсаhа оёжо үгэдэг юм. Ородой Холбоото Уласай Буддын Сангхын Хамба лама Дамба Аюшеев имагтал залуушуулда зорюулжа оёhон хубсаhыень hайшаадаг. Буряад залуу үетэн иимэ хубсаhа үмдөөд ябаха hэнта гэжэ уряалдаг. Уласай толгойлогшо байһан Вячеслав Наговицын, Соёлой яаманай сайд байhан Тимур Цыбиков гэгшэд Игорь Сарапуловай зохёоhон хэбээр оёhон хубсаhа-дэгэл, зунай хүнгэн жилет, пиджак “Алтарганын” нааданда захиhан байха.
Залуу гэр бүлэнүүдэй мүндэлхэдэ, түрэ дээрэ хүрьгэн хүбүүн бэри басаган хоёрой үмдэхэ гоёлой, шэнэ маягаар оёhон хубсаhан олон зоной анхарал татадаг, ехэтэ hайшаагдадаг. Золто Вероника Шагдаржаповтан түрэ дээрээ Игорь Вячеславовичай зохёоhон буряад түрын хубсаhанда дурлажа, захил хээ. Энэ түрын хубсаhанай онсо тэмдэгынь гэхэдэ, иимэ юм…Дүрбэн хубиhаа бүридэhэн, ганса гансаарнь ондоо хубсаhатай тааруулан, үмдэжэ болохо. Жэшээнь, топ юбкэ хоёрыень ами амяараа, бодоод байhан заха, манто хоёрые баhал тиигээд үмдэжэ болохо. Ехэнхи бэреэд- басагад түрэдөө нэгэхэн үдэрэй туршада үмдөөд, гардероб соогоо холо саана үлгэжэрхидэг, али үгы hаа, комиссионно дэлгүүртэ тушаажархидаг зантай. Игорь Сарапуловай хэбээр оёhон 4 ондоо хубсаhан хадаа саашадаа гоёлой хубсаhан боложо үгэхэ, түрэ нара бүтээжэ байhан түрэлхидтэ мүнгэндэнь нилээн алмалта болоно…
Манай эстрадын одод Бадма-Ханда Аюшеевада, Мэдэгма Доржиевада, Дарима Цырендондоповада, Лариса Иринцеевада г.м. хатан гоо басагадта гоёлой хубсаhа бэедэнь тааруулжа бүтээhэн юм. Интернет-сүлжээнэй холбоогоор энэ тэрэ асуудал табидаг хүнүүдтэ хайшан гээд хубсалаа hаатнай дээрэб гэжэ зохидхон заабаринуудые үгэдэг.
Нагаса эжынгээ заабаряар, бууралhаа үреэлэй сэнтэйень шагнан хадуужа абаhан Игорь Вячеславович буряадайнгаа нюдэ баярлуулма хубсаhа шэнэ маягаар залуушуулда үзэсхэлэн дэлгээжэ, харуулжа байдаг, жабдан (подиум) дээрэ үндэр сэбэр, hайхан бэетэй хүүхэд Игорь Сарапуловай зохёоhон гоё хубсаhа үмдөөд, нахис- хотос гэшхэлхэдэнь, хүн бүхэнэй досоо наран гарадаг ха даа гэжэ hанахаар…
Сэлэнгэ аймагай, Yбэр Зөөхэйн сомоной, Нур Түхэмэй Арша Баабайн Обоогой харууhатай, Бултамуур дасандаа шүтэжэ байдаг Игорь Вячеславович Сарапулов тухайгаа зураглалаа дүүргэбэб.
Нина АРТУГАЕВА
