​Видео – ерээдүй сагай мэдээсэлгын арга

Улаан-Үдэ хотодо ноябриин 22-23-ай үдэрнүүдтэ Байгалай медиа-хуралдаан боложо үнгэрбэ. Мүнөө компьютерай ехээр хэрэглэгдэдэг болоһон, мүн IT оньһоной нэбтэрһэн үедэ иимэ хуралдаан хэрэгтэй гэжэ һанамаар.

Хоёр үдэрэй туршада долоон талмайнуудаар үнгэрһэн энэ хуралдаанда олон асуудалнууд хэлсэгдээ. Дэлхэйн бүхы һонин мэдээсэл мэдээд байбал, туһатайшье, хэрэгтэйшье. Хүн зондо һонинуудые түргэн мүрөөр, бэлэн, ойлгосотой түхэлөөр дуулгажа байбал, ямаршье хилэ хэрэггүй ха юм. Дэлхэйн энэ һалбариин мэргэжэлтэдэй шадабарияа дээшэлүүлжэ, амжалта туйлажа байбалнь, бүри һайн. Тиимэһээ Буряад Уласай мэргэжэлтэд нютаг соогоошье, гадууршье ажалаа эршэмтэйгээр ябуулха гэжэ оролдоно. Хуралдаанай үедэ тэдэ һанамжануудаараа хубаалдаа, шухала асуудалнуудые хэлсээ.

Хуралдаанай нэгэ хэлтэсые “Россия сегодня” гэһэн уласхоорондын мэдээсэлэй агентствын продюсер, сүлжээ холбооной талаар сэгнэн шэнжэгшэ Роман Гришин хүтэлэн ябуулжа, “Гүрэнэй засаг зургаануудай ажалда SMM” гэһэн мастер-класс үнгэргөө. Тиихэдээ видео ямар байха ёһотойб ба яагаад буулгаха хэрэгтэй гээшэб гэжэ онсолон тэмдэглээ.

“Зүгөөр видео гээшые хүн элдэбынээр буулгаад лэ, бүхы Фейсбук, Одноклассники, Вконтакте, Инстаграмм гэхэ мэтын сүлжээ холбоондо табина. Энэ дээрэ хэлэгдэһэн сүлжээ холбоонуудые хэрэглэхэдэ болохо, харин видео гээшые зүб мүрөөр буулгаха хэрэгтэй”, - гэжэ Роман Гришин хэлээ.

Видео хадаа, нэгэдэхеэр, хүнэй һонирхол татама, мүн богони, 2-3 минутын саг эзэлһэн, байха ёһотой бшуу. Хоёрдохёор, ажаһуугшадай 85 хубиин видео харадаг хадань, тэбхэр түхэлөөр буулгаха хэрэгтэй. Гурбадахяар, доогуурнь заал һаа бэшэмэл ябуулагдажа байха ёһотой. Видео гээшэ ерээдүй сагай мэдээсэлгын түхэл болоно.