874
Хори буряадуудай домог тухай хэншье мэдэхэл, уншаһаншье байхал даа. Энэ домог сэдьхэл хүдэлгэмэ гүнзэгы удхатай, абаhаар лэ манай аба эжы тухай гэжэ hанахаар байна. Абамнай, Жамбалдоржиев Баян Жалсанович, эжымнай, Жамбалдоржиева Зоя Акимовна, Хори аймагай амгалан тэнюун Амгаланта нютагта 1969 ондо айл боложо түбхинөөд, найман баатар хүбүүтэй, нэгэ дангина басагатай болоо.
Манай аба эжы ажалша бэрхэ, бэе бэедээ энэрхы сэдьхэлтэй, олондо жэшээ болоһон гэр бүлэ гэжэ хэлэхэдэ, алдуу болохогүй. Бүхы наhаараа нэгэшье үдэр хүдэлэнгүй байгаагүй, колхозой ажалда гээгдэнгүй, ударидагша хүдэлмэришэд ябаа. 1990 оной hандаралтын хүндэ сагта «ажал хэhэн хүн юундэшье диилдэдэггүй» гээд, малда гаража, үхибүүдээ дүй дүршэлтэй, ажалша, hайн hургаалитай, нютагтаа хүндэтэй хүнүүд болгожо шадаа гээшэ.
2012 ондо Хамба лама Дамба Аюшеевэй дурадхалаар манай аба эжы эгээл түрүүшын ниигэмэй программа эдэбхитэйгээр бэелүүлжэ, нютагайнгаа залуу айлда 75 эхэ хонидые бэлэг болгон барюулhан габьяатай. Ажал хэрэгүүдыень гүрэмнай үндэрөөр сэгнэжэ, Эхэ эсэгын алдар солын орденоор, “Дуратай ба найдамтай байһанай түлөө” медаляар шагнаа һэн. Гадна Буряад Уласай Хүдөө ажахын яаманай, Буряад Уласай Хүндэлэлэй грамотануудаар, Арадай Хуралай, аймагай засаг зургаанай тоолошогүй олон грамотануудаар, Баярай бэшэгүүдээр урмашуулагданхай.
Эжы абымнай ажабайдалаар hонирхожо, олон хүн айлшаар ерэhэн байна. Жэшээлхэдэ, Никита Михалковой зохёохы бүлэг ерэжэ, фильм буулгаа, мүн тиихэдэ АТВ телевидени «Ехэ бүлын нэгэ үдэр» гэжэ баримтата фильм дамжуулаа. Арадай Хуралай Түрүүлэгшэ Ц.-Д.Э.Доржиев эжы абымнай тоонто нютагта халуун сайень уужа, уулзаhандаа баяртайб гэжэ хэлээ hэн. Урда жэлнүүдтэ Гүрэнэй Дүүмын һунгамал Михаил Слипенчук уулзахаа ерэhэн байна. 2011 ондо Москвагай залуушуулай хуралдаанай айлшад манай ехэ гэр бүлэдэ айлшалаа. Нёдондо «Алтаргана” нааданай «Нангин бууса» гэhэн мүрысөөндэ лауреадууд болоо. Энэ жэлдэ Москва хотодо гүрэнэй хэмжээнэй «Эрхим гэр бүлэ» гэhэн мүрысөөндэ хабаадажа, илаһан байна.
Мүнөө намарай hайхан сагта аба эжымнай Уласай ветерануудай зүблэлэй түрүүлэгшые, түлөөлэгшэдые гэртээ айлшаар урижа, халуунаар угтаhан байна. Эжы абамнай юугээрээ hонирхол татанаб гэhэн асуудал дээрэ бодомжолходо, манай эхэ эсэгэдэл адляар бурханай үгэhэн инаг дурандаа, гал гуламтынгаа нангин буусада, хайрата үри хүүгэдтээ айл бүхэнэй шүтэн ябаа hаа, гүрэмнай шанга байха гэжэ hанагдана. Бидэ, үхибүүдынь, элинсэг хулинсагайнгаа, үбгэ эсэгынгээ, эжы абынгаа буянгаар жаргалтай ябаhандаа урмашан, заншалыень, ажал хэрэгүүдыень саашань үргэлжэлүүлхэ ёhотойбди. Манай эжы абаһаа ганса үхибүүдынь бэшэ, харин нютагайнь, аймагайнь зон жэшээ абадаг. Иимэ эжы абатай байhандаа бидэ ехэ омогорхонобди, саашадаа эжы абадаа үшөө олон жэлдэ хүнгэн, элүүр зандаа ажаhуугыт даа гэжэ үреэнэбди.
Цыцыкма ЖАМБАЛДОРЖИЕВА, бэри басаганиинь
