799
Үсэгэлдэр үнгэргэгдэһэн Арадай Хуралай сессидэ һунгамалнуудай нюуса һунгалтын дүнгүүдээр, Евгений Луковников Буряад Уласай Засагай газарай Түрүүлэгшын хангалгын байгууламжа хүгжөөхэ талаар орлогшын тушаалда томилогдобо.
Һунгалтын дүнгүүдээр, Евгений Луковниковай түлөө 52 һунгамалнууд дуугаа үгөө, зургаан хүн буруушаагаа.
«Евгений Валентинович, таниие амаршалхыем зүбшөөгыт, аша үрэтэйгөөр ажалаа ябуулхыетнай хүсэнэб. Та харюусалга ехэтэй тушаал эзэлбэт, Улаан-Үдэдэ болон бусад нютагуудта дулаагаар, уһаар хангаха соргонуудта болоһон һүүлшын аюулнууд энээнэй гэршэ болоно», - гэжэ Буряад Уласай Арадай Хуралай түрүүлэгшэ Цырен-Даша Доржиев хэлэбэ.
Евгений Луковников Алас Дурна зүг болон Байгалай хизаар хүгжөөхэ программануудта хабаадана гэжэ Станислав Тэлин хэлэбэ. Тэрэнэй хүтэлбэри доро хангалгын байгууламжын шэнэ барилганууд ашаглалгада тушагдаа, тэрэнэй тоодо Үбэр Байгалай хизаарта Транссибай шэнэ харгы.
«Евгений Луковников Буряад Улас һайн мэдэнэ, тэрэнэй хүтэлбэри доро Зүүн Сибириин түмэр харгыда барилганууд хэгдээ», - гэжэ Станислав Тэлин тэмдэглэбэ.
Евгений Луковников өөрынгөө программа дурадхажа, дулаагаар, зайн галаар хангалгын һалбарида гэнэ ушаргүйгөөр ажал ябуулха тухай хэлэбэ. 2017 оной дүрэтэр баригдажа дүүрэхэ ажалнуудые ашаглалгада тушааха тухай хаража үзэхэ тухайгаа тэрэ хэлэбэ. Сэбэрлэлгын түхеэрэлгэнүүдые, уһаар, дулаагаар, зайн галаар хангалгын һалбари заһабарилха программа хүгжөөхэ талаар ажал ябуулха тухайгаа Евгений Луковников мэдүүлбэ. Тиихэдэ харгын хангалгын байгууламжа хүгжөөхэ,заһабарилха, зайн галай комплекс байгуулжа хүгжөөхэ тухай сайд тэмдэглэбэ.
Саха Уласай Транспортын болон харгын ажахын яаманай мэдээсэлэй албанһаа гэрэл зураг абтаба.
