954
Ородой Холбоото Уласай можо нютагуудта үнгэргэгдэдэг үбэлэй эрхим нааданууд болон фестивальнуудые шэнжэлхы ТурСтат агентство элирүүлбэ.
Жэл бүри үнгэргэгдэдэг эгээл һонирхолтой үбэлэй наадануудай эрхим арбанай тоодо Буряад Уласта үнгэргэгдэдэг Сагаалганай найр наадан оруулагдаһан байна. Аяншалагшадай һонирхол татаһан эрхим нааданууд энэ тобьёгто ороо гэжэ тэмдэглэхэ хэрэгтэй. Тиихэдэ Ородой Холбоото Уласай үбэлэй эрхим наадануудай тоодо Алтай хизаарай «Алтайская зимовка», Ярослав можын «Зимние забавы в Угличе», Удмуртиин «Сказочные герои на родине Тол Бабая», Архангельск хотын «День рождения Архангельского Снеговика», Якутск хотын «Зима начинается с Якутии», Карелиин «Олонецкие игры Дедов Морозов», Тывагай «Ледовая сказка в центре Азии», Томск хотын «Хрустальный Томск», Элиста хотын «Калмыцкий Новый год Зул» гэһэн наадан болон фестивальнууд эрхим гэжэ элирүүлэгдэһэн байна.
2018 оной февралиин 16-18-най үдэрнүүдтэ, Улаан-Үдэдэ «Үльгэртэ Сагаалганай» найр нааадан үнгэргэгдэхэ. Эдэ наадануудай гол үйлэдэгшэ хадаа Сагаан Үбгэн болоно. Шэнэ жэлдэ айлшаар Йоулупукки, фин арадуудай Үбгэн Жабар морилхо.
Үнгэрһэн наадануудта Великий Устюг хотоһоо бүхэроссиин Үбгэн Жабар болон үльгэрэй айлшад буугаа. Ородой Холбоото Уласай можо нютагуудай, Хитад, Урда Солонгос, Испани, Канада болон Америкын Холбоото Штадуудай хэдэн мянган аяншалагшад Сагаалганай найр наада хараһан байна.
