849
Бэлигтэй багша Баяр Самаданович Гомбоевой дурасхаалда болон «Клуб - Буряад Уласай багша» гэһэн уласай олониитын эмхиин байгуулагдаһаар 15 жэлэй ойдо зорюулагдажа, залуу багшанарай дунда мүрысөөн Улаан-Үдэдэ эмхидхэгдэһэн байна.
Залуу багшанар хоёр шатаһаа бүридэһэн мүрысөөндэ хабаадаба. Тэрэнэй дүнгүүдээр, Хори аймагай Дарма Жанаевай нэрэмжэтэ 1-дэхи һургуулиин эхин классуудай багша Оюна Намдакова түрүүлбэ. Тиихэдэ В. Мункинай нэрэмжэтэ Хэжэнгын лицей-һургуулиин физикын багша Булат Гунгаевич Дарибазарон нэгэдэхи һуури эзэлбэ. Хоёрдохи һуурида Улаан-Үдэ хотын 47-дохи һургуулиин англи хэлэнэй багша Чимита Ажиповна Абидуева хүртэбэ. Буряад уласай Үндэһэтэнэй 1-дэхи лицей-интернадай түүхын багша Николай Платонович Федоров болон Яруунай аймагай Нарһатын 1-дэхи һургуулиин эхи классуудай багша Дарима Доржиевна Цыренова хоёр 3-дахи һуури эзэлбэд.
Илагшадые амаршалгын ёһололдо Буряад Уласай Болбосоролой болон эрдэм ухаанай сайдай орлогшо Валерий Поздняков, Буряад Уласай болбосоролой бодолгын институдай захирал Владимир Цыренов, Арадай Хуралай һунгамал Оксана Бухольцева, Улаан-Үдын Болбосоролой хорооной юрэнхы болбосоролой таһагай дарга Дулма Балданова болон «Буряад Уласай эрхим багша» гэһэн клубай түлөөлэгшэд хабаадаһан байна. Мүрысөөндэ хабаадагшадта дипломууд барюулагдаа.
