691
Буряад Уласай Толгойлогшо Алексей Цыденов Улаан-Үдын Ключевская гудамжада оршодог «Фаворит» гэһэн олон байратай гэртэ барилгын хоёрдохи шата дүүргэхэ тухай хэлсээ баталба.
Тэрэнэй ёһоор, 2018 оной сентябриин 30 болотор «Зодчий» компани 270 байрануудые ашаглалгада тушааха ёһотой. Тиихэдэ гэрэй барилгада мүнгэ һомолһон, гурбадахи ээлжээндэ байһан хүнүүд байратай болохо. Буряад Уласай Барилгын болон гэр байрын ажахы шэнэдхэлгын яаманай мэдээсэһэнэй ёһоор, гэр барилгада мүнгэеэ оруулагшадай урда абтаһан уялга дүүргэгдэхэ. Энэ барилга дүүргэхын тула 90 сая түхэриг мүнгэн хэрэгтэй. «Фаворит» гэһэн байшанай байрануудые худалдажа, мүнгэтэй болохо гэжэ түсэблэгдэнэ. Мүнөө дээрээ барилгын хоёрдохи шата дүүрэхэ болоод байна. Гэрэй таһалганууд, хушалта, сонхонууд бэлэн. Тиихэдэ зайн галаар, уһаар хангаха талаар зарим ажалнууд хэгдэнхэй.
«Фаворит» байшанай барилга дүүргэхэ гэһэн хэлсээ бэелүүлхэ талаар энэл гэр барилгада мүнгэеэ оруулһан олзын хэрэг эрхилэгшэ бэедээ даажа абанхай. Тиихэдэ Буряад Уласай Засагай газар хуби ниилүүлһэн нээмэл «ТГК-14», хуби ниилүүлһэн «Улан-Удэ Энерго» бүлгэмүүдэй һужаануудта хабсаруулха, газар дайдыень болбосон түхэлтэй талаар туһа хүргэхэ, барилгын ажалнуудые хинаха юм.
