611
Ородой Холбоото Уласай Транспортын яаманай Москва хотодо эмхидхэһэн «Ородой Холбоото Уласай Транспорт» гэһэн уласхоорондын XI-дэхи хуралдаанда Буряад Уласай Толгойлогшо Алексей Цыденов хабаадана.
Ородой Холбоото Уласай Засагай газар, Ородой Холбоото Уласай болон хари гүрэнүүдэй Транспортын яаманай хүтэлбэрилэгшэд, транспортын һалбарида хүдэлдэг компанинууд, можо нютагуудай хүтэлбэрилэгшэнэр, можо нютагуудай транспортын һалбариин, уласхоорондын болон олониитын эмхинүүдэй түлөөлэгшэд, эрдэмтэд энэ хуралдаанда хабаадаха. Тэдэнэр мүнгэн һангай, ажалай талаар, транспортын болон хангалгын байгууламжын түсэлнүүдые бэелүүлхэ оршон байгуулха, транспортын һалбарида мүнгэ һомололгын болон мэргэжэлтэдые бэлдэхэ асуудалнуудаар хэлсэхэ юм.
Буряад Уласай Толгойлогшо Алексей Цыденов «Ородой Холбоото Уласай транспорт» гэһэн уласхоорондын үзэсхэлэндэ, «Транспорт России. В гармонии с природой» гаршагтай дискуссида хабаадаха юм. Тиихэдэ Алексей Цыденов Ородой Холбоото Уласай Засагай газарай түрүүлэгшэ Дмитрий Медведевэй хүтэлбэри доро «Аюулгүй, һайн шанартай харгынууд» гэһэн түсэл бэелүүлгын асуудалнуудаар зүблөөндэ хабаадаха.
Тээбэриин һалбариин асуудалнуудаар Ород болон хари гүрэнүүдэй түлөөлэгшэдэй хабаадалгатайгаар үнгэргэгдэдэг «Транспортная неделя» гэһэн албанай хэмжээ ябуулга Ородой Холбоото Уласай Транспортын яаман арбаад жэлэй туршада эмхидхэнэ. «Транспортная неделя» гэһэн хэмжээ ябуулгын үедэ уласхоорондын «Ородой Холбоото Уласай транспорт» XI-дэхи хуралдаан, XI-дэхи уласхоорондын үзэсхэлэн, транспортын һалбариин оюутадай бүхэроссиин IX-дэхи спартакиада, Транспортын дээдэ һургуулинуудай оюутадай «ТранспАРТ» гэһэн зохёохы бэлиг талаангай бүхэроссиин фестиваль, «Road Traffic- 2017. Организация дорожного движения» гэһэн уласхоорондын конгресс болон бусад хэмжээ ябуулганууд үнгэргэгдэхэ. Тиихэдэ автомашинын, авиационно, түмэр замай, далай болон голнуудай транспорт хүгжөөхэ асуудалнуудаар хуралдаанда хэлсэхэ.
Жэл бүри тээбэриин асуудалнуудаар үнгэргэгдэдэг хуралдаан болон үзэсхэлэндэ 7500-һаа дээшэ хүн хабаададаг. «Транспортная неделя» гэһэн хэмжээ ябуулгын үедэ дүн хамта 9500-һаа дээшэ хабаадагшад ерэдэг. Тус һалбарида «Ородой Холбоото Уласай Транспорт» гэһэн хуралдаан эгээл томо, аша үрэтэй уласхоорондын хэмжээ ябуулгануудай нэгэн гэжэ тоологдодог.
Анна Огороднигой гэрэл зураг.
