715
Шэнэ жэлэй угтамжын Бүхэроссиин наадан Гүрэнэй Кремлиин ордондо декабриин 26-да үнгэргэгдэхэ. Энэ хэмжээ ябуулгада Ородой Холбоото Уласай можо нютагуудай болон Абхази, Зүүн Осети гүрэнүүдэй 8-тайһаа 13 хүрэтэр наһанай үхибүүд уригданхай. Буряад Уласһаа 74 үхибүүд болон 10 хүтлбэбэрилэгшэд Шэнэ жэлэй нааданда хабаадаха.
Бүхэросиин Шэнэ жэлэй нааданда хабадаха үхибүүд - шэлэн абалгын шата гараһан байна. Тиимэһээ Буряадай делегациин бүридэлдэ эрхим һурагшад, олимпиада болон мүрысөөнүүдтэ илагшад, үншэн үхибүүд, түрэлхидэй харууһагүй үлэһэн үхибүүд, эрэмдэг бэетэй үхибүүд, алба дүүргэхэ үедөө наһа бараһан сэрэгшэдэй үхибүүд ороһон байна.
Ород гүрэнэй ниислэл хотодо үхибүүд Москвагай планетарий, Москвагай Большой цирк, аха дүү Запашнануудай цирк, Кремлиин музейн Оружейнэ танхимда хүрэжэ, соёлой-сэнгүүлгын программнуудтахабаадаха. Үхибүүдэй самолёдоор аюулгүйгөөр ниидэжэ хүрэхэ тухай декабриин 12-то Ородой Холбоото Уласай агаарай транспортын Зүүн Сибириин можо хоорондын хүтэлбэриин дарга Василий Бурахович зүблөө үнгэргэһэн байна. Тиихэдэ энэ зүблөөндэ «Байкал» аэропортын хүтэлбэрилэгшэд, Буряад Уласай албан газарай, Болбосоролой болон эрдэм ухаанай, Ниигэмэй хамгаалгын яамануудай түлөөлэгшэд хабаадаласаһан байна.
Үхибүүдэй харгыда гараха үдэр аюулгүй байдал сахигшад олоор хүдэлхэ. Аэропортдо тэдэнэр амяараа бүридхэл гараха аргатай байха. Кремлиин нааданда үхибүүдэй ошохо агаарай замда Литер «К» гэһэн зэргэ олгогдонхой. Ородой Холбоото Уласай хуулиин ёһоор, Юрэнхылэгшын тусхай зарлигаар, гүрэнэй хүтэлбэрилэгшэд болон хари гүрэнүүдэй Засагай газарай түлөөлэгшэдые харууһатайгаар харгыда ябахада энэ зэргэ олгогдодог юм.
