922
Ородой Холбоото Уласай Транспортын яаманай дэргэдэхи Албан хоорондын комиссида Үдэ гол дээгүүр гурбадахи хүүргэ бариха тухай мэдүүлгэ апрель һарада оруулагдаха гэжэ Буряад Уласай Толгойлогшо Алексей Цыденов хэлэбэ.
Буряад Уласай олондо мэдээсэл тараадаг хэрэгсэлнүүдэй түлөөлэгшэд гүрэнэй хүтэлбэрилэгшэтэй пресс-конференцидэ хабаадаха үедөө Байгал далай шадар тохёолдоһон байдалаар болон Улаан-Үдэдэ Үдэ гол дээгүүр хүүргэ бариха тухай Владимир Путинда хэлэһэн байна. Буряад Уласай Толгойлогшо «Тивиком» телекомпаниин сурбалжалагша Юлия Пермякова болон Буряадай гүрэнэй телевидениин сурбалжалагша Илья Кошлюновто баяраа мэдүүлээ.
«Улаан-Үдын харгынуудта машинанууд олоор сугларна, тиимэһээ гурбадахи хүүргэ тухай асуудал тон шухала. Үнгэрһэн һарада хүүргэ барилгын талаар техническэ шиидхэбэринүүд абтаа. Тиихэдэ энэ хүүргэ хэды зуруудтай байхаб, транспорт ондо ондоо тээшэнь шэглүүлхэ газарнууд тухай хэлсэгдээ. Энэ хүүргэ түмэр харгы хүндэлэн гараха, Лазо болон 3-я Транспортная гудамжануудта бууха харгы хэгдэхэ. Энэ хадаа инженернэ томо барилга болохо», - гэжэ Алексей Цыденов хэлэбэ.
Үдэ гол дээгүүр гараха гурбадахи хүүргын түсэл бэлэн, гүрэнэй болон хубиин талаһаа суг ажал ябуулагдажа, барилга хэгдэхэ болоно. Энэ хүүргэ барилгада мүнгэн һомологдожо эхилһэн сагһаа 2023 он болотор түсэл бэелүүлэгдэхэ. Мүнөө дээрэ хүүргэ барилгада хэды шэнээн мүнгэн гаргашалагдахаб гэжэ тоологдонхой. Тэрэнэй тоодо бүхы барилгада, газарай участогуудые таһалха, худалдан абаха гэхэ мэтэ. Бүхыдөө 6,4 миллиард түхэриг гаргашалагдаха гэжэ тоологдоо, тэрэнэй 2,3 миллиард түхэриг хубиин мүнгэн. Бэшэниинь бюджетһээ һомологдохо.
Алексей Цыденовэй тэмдэглэһээр, Москва хотодо үнгэргэгдэһэн «Транспортная неделя» гэһэн хэмжээ ябуулгын үедэ энэ түсэлөөр Росавтодорой хүтэлбэрилэгшэ Роман Старовойтовтой тэрэ хэлсэһэн байна. «Манай түсэлөөр зохихо шиидхэбэри абтаха гэжэ найданабди», - гэжэ Буряад Уласай хүтэлбэрилэгшэ хэлэбэ.
Байгалай байгаалиин газар тухай
Байгалай хизаартай ажаһуудаг зоной ажабайдалда һаад, хохидол ушаруулхагүйн түлөө хуулида оруулагдаха нормативна хубилалтанууд бэлдэгдэнхэй.
«Байгалда үнгэргэгдэһэн зүблөөнэй удаа Ородой Холбоото Уласай Юрэнхылэгшын үгэһэн даабаринуудые бэелүүлжэ, нормативна хубилалтанууд бэлдэгдэжэ, тэдэнэй зариманиинь Гүрэнэй Дүүмэдэ, нүгөө зариманиинь Засагай газарта оруулагданхай », - гэжэ Алексей Цыденов хэлэбэ.
Энэ хубилалтанууд «Байгал аршалха тухай» гэһэн хуулида, Газарай кодексдо оруулагдаха. Тэрэнэй ёһоор, түймэр һэргылжэ, модо сабшаха аргатай болохо, ЮНЕСКО эмхиин мэдэлдэ ородог газарнуудай хизаарлалта болюулха болон бусад.
