739
Буряад Уласай Сэлэнгэ аймагай гулваагай һунгалта декабриин 17-до үнгэргэгдэбэ. Гурбан жэлэй туршада Сэлэнгэ аймаг хүтэлбэрилжэ байһан Вячеслав Цыбикжапов Буряадай Уласай Засагай газарай Түрүүлэгшын ниигэмэй хүгжэлтын талаар орлогшын тушаалда томилогдожо, Сэлэнгэ аймагта гулваа һунгагдаба.
Аймагай хүтэлбэрилэгшын тушаалда 4 хүн зууршалһан байна. Хэд бэ гэхэдэ, наһанайнгаа амаралтада гараһан Зургаан-Дэбэ нютагай Дашацырен Буянтуев, Вячеслав Цыбикжаповай нэгэдэхи орлогшо байһан, аймагай гулһаагай уялга дүүргэгшэ Станислав Гармаев, хизаарлмал харюусалгатай «Алекс» бүлгэмэй барилгын талаар захиралай орлогшо, ЛДПР намай Буряадтахи таһагай залан хүтэлбэрилэгшэ, Ородой Холбоото Уласай Гүрэнэй Дүүмын һунгамал Юрий Волковой туһалагша Николоай Липский болон 25 наһатай Сэлэнгэ аймагай захиргаанай ажаябуулга хангаха хүтэлбэриин контрактна албанай таһагай ахамад мэргэжэлтэн Андрей Мацнев гэгшэд болоно.
Һунгалтада хабаадаһан Станислав Гармаевай түлөө 10640 хүн, һунгалтада хабаадаһан хүнүүдэй 86, 81% хубинь дуугаа үгэһэн байна. Николай Липскиин түлөө 837 хүн, энэнь һунгагшадай 6,83 хубинь болоно. Дашацырен Буянтуевай түлөө 319 хүн, энэнь 2,6 һунгагшадай хубинь, Андрей Мацневай түлөө 287 хүн, энэнь һунгагшадай 2,34 хубинь болоһон байна.
Бүхыдөө һунгалтада 12 257 хүн дуугаа үгэһэн байна, энэнь Сэлэнгэ аймагай ажаһуугшадай 39,9 хубинь болобо.
Сэлэнгэ аймагай захиргаанай сайтһаа гэрэл зураг абтаба.
