699
Буряад Уласай Арадай Хуралай һунгамалнууд Монгол гүрэнэй Сэлэнгэ аймагай түлөөлэгшэдтэй уулзаба.
Буряад Уласай Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшын уялга дүүргэгшэ Валерий Доржиев хүршэ гүрэнэй һунгамалнуудтай уулзаба. Хүршэ арадуудай эбтэй эетэй ажаһуухын түлөө Монголой түлөөлэгшэдэй ябуулдаг ажал үндэрөөр сэгнэнэбди гэжэ Валерий Дожиев хэлэбэ.
Буряад уласай болон Монгол гүрэнэй Сэлэнгэ аймагай Арадай Хурал парламентнууд хоорондын суг ажал ябуулха тухай хэлсээ анха түрүүн 2001 ондо баталһан юм. Хилэ шадар оршодог газарнуудые хүгжөөхэ зорилготой энэ хэлсээн һаяхана үргэлжэлүүлэгдээ.
- Манай арадуудай болон гүрэн түрын хүгжэлтын түлөө ажалаа суг ябуулхаар бэлэмди. Хоёр гүрэнүүдээр Буряадай болон Монголой түлөөлэгшэд албанай хэрэгээр ябажа, олон хэрэгүүдые бүтээһэниинь гэршэ болоно, - гэжэ Валерий Доржиев тэмдэглэбэ.
Монголой Сэлэнгэ аймагай засаг даргын нэгэдэхи орлогшо, ниигэмэй-ажалай харилсаа гуримшуулха комиссиин толгойлогшо Б. Нарантуяа Буряад Улас ерэһэн зорилгоёо хэлэбэ. Эдэнэр хадаа уласай профсоюзай эмхинүүдтэй уулзаха хүсэлтэй. Монгол гүрэнэй гурбан талын комисси хадаа ниигэмэй-ажалай һалбариин уласхоорондын дүй дүршэлтэй танилсажа, ажалай хуули ёһоной талаар хари гүрэнүүдэй эмхидхэдэг хэмжээ ябуулгануудта хабаадаадаг юм. Саашадаа суг хамта ажал ябуулха талаар дурадхалнуудые һунгамалнууд оруулба.
Буряад Уласай Арадай Хуралай гэшүүдтэ Б. Нарантуяа аша үрэтэйгөөр ажал ябуулһанай түлөө баяраа мэдүүлбэ.
