749
2017 ондо Хойто Байгалай, Мууяын аймагууд болон Северобайкальск хотонуудта үмхирһэн гэр байрануудһаа хүнүүдые зөөлгэхэ хэрэгтэ федеральна болон уласай һанһаа 351,18 сая түхэриг мүнгэн һомологдоо. Тэрэнэй ашаар 170 гэр бүлэнүүд зөөһэн байна.
2016 оной июнь һарада Буряад Уласай Засагай газарта абаһан гуримаар хүнүүд үмхирһэн гэрнүүдһээ зөөнэ. Ямар гурим бэ гэхэдэ, хуушарһан гэрнүүдые тусхай дансануудтайгаар бүридхэлдэ оруулжа, нютагай засагай байгууламжанууд Буряад Уласай Барилгын болон гэр байрын ажахы шэнэдхэлгын яаманда эльгээнэ. Удаань Барилгын яаманда зөөхэ ээлжээн байгуулагдадаг. Тиихэдэ хэдэн хэмжүүрнүүд баримталагдадаг. Нэрлэбэл, Байгал-Амарай зам барилгын үедэ хүдэлмэрилэгшэдтэ үгтэһэн гэрнүүдэй коммунальна хангалгын байгууламжын байдал, олон байратай гэрнүүдэй үмхирһэн, тэдэниие задалха гэһэн шиидхэбэриин абтаһан гараг үдэр, хүнүүдэй ажаһуухада аюултай гэжэ тоологдоһон гараг гэхэ мэтэ болоно. Эдэ хэмжүүрэй ёһоор балл тоологдожо, ээлжээн байгуулагдадаг. Адли балл абаһан байбалнь, гэрэй талмайн хэмжээн баримталагдадаг. Тиихэдэ БАМай баригдажа байһан үедэ гэртэй болоһон хүнүүд түрүүлэн ээлжээндэ оруулагдадаг.
2017 оной ноябрь һарада Буряад Уласай хойто аймагуудай нютагай засагай байгууламжанууд Барилгын болон гэр байрын ажахы шэнэдхэлгын яаманда 418 бүлэнүүдые зөөлгэхэ тухай нэмэлтэ бүридхэл оруулаа. Тэдэнэй тоодо, түрүүлэн ээлжээндэ байһан БАМай барилгашадай 135 гэр бүлэнүүд бии. Энээнһээ уламжалан, ээлжээндэ хубилалтануудые оруулха шиидхэбэри абтаа.
Буряад Уласай Толгойлогшо болон Засагай газар энэ асуудалаар орёо байдал ойлгожо, уласай һанһаа нэмэлтэ 155,8 сая түхэриг һомолхо гэһэн шиидхэбэри абаһан байна. Энэ шиидхэбэриин ашаар, Мууяын аймагай БАМай барилгашад 2018 ондо мүнгэн тэдхэмжэдэ хүртэхэ. Нэмэлтэ мүнгэнэй һомологдоогүй һаа, эдэнэр бүри 2019 ондо хуушарһан гэрһээ зөөхэ байгаа.
Хуушарһан гэрнүүдһээ зөөхэ гэр бүлэнүүдтэ заатагүй туһа хүргэгдэхэ гэжэ Буряад Уласай Барилгын болон гэр байрын ажахы шэнэдхэлгын яаманда тэмдэглэбэ.
- 2018 ондо мүнгэн тэдхэмжэдэ хүртэхэ эрхэтэй гэр бүлэнүүд хэлэгдэһэн болзортоо мүнгэ абаха ёһотой гэжэ Буряад Уласай Засагай газарта зорилго хараадаа абажа, зохихо шиидхэбэри абтаа, - гэжэ Буряад Уласай Барилгын болон гэр байрын ажахы шэнэдхэлгын сайд Николай Рузавин хэлэбэ.
Хуушарһан гэрнүүдһээ хүнүүдые зөөлгэхэ хэрэгтэ 2015-2020 онуудта «Жилище» гэһэн федеральна программа бэелүүлэгдэжэ, федеральна болон уласай бюджедһээ мүнгэн һомологдоно гэжэ Буряад Уласай Барилгын болон гэр байрын ажахы шэнэдхэлгын яаманда мэдээсэнэ.
