900
Мүнөөдэр, декабриин 20-до, Буряад Уласай Арадай Хуралай ээлжээтэ бэшэ сессидэ Буряад Уласай Толгойлогшын орлогшо – Буряад Уласай Толгойлогшын болон Засагай газарай захиргаанай хүтэлбэрилэгшын тушаалда Баир Цыренов томилогдобо.
Буряад Уласай Арадай Хуралай нюуса һунгалтын дүнгүүдээр Баир Цыреновые тушаалда дэбжүүлхын түлөө 47 һунгамалнууд дуугаа үгэбэ, 5 һунгамалнууд буруушааһан байна.
«Буряад Уласай Толгойлогшын захиргаан хүтэлхэ тухай дурадхал оруулһан Алексей Самбуевичта баяраа мэдүүлнэб. Энэ ехэ харюусалгатай ажал гэжэ ойлгоноб. Буряад Уласай Засагай газарай Түрүүлэгшын орлогшын тушаалда улас доторхи бодолго болон тэрэнэй байдалай түлөө харюусалга даажа абанаб. Улас дотор эдэй-ниигэмэй һалбариин хүгжэхын тула ниитэ-бодолгын тогтууритай байдал байгуулха шухала. Тиихэдэ Буряад уласай намуудтай, бодолгын болон шажан мүргэлэй нэгэдэлнүүдтэй ажал ябуулха шухала. Энэ талаар ажал үлүү үгэгүйгөөр, үнэн сэхээр ябуулагдаха», - гэжэ Баир Цыренов хэлэбэ.
Буряад Уласай Толгойлогшын захиргаанай хүтэлбэрилэгшын тушаалда томилогдоһон Баир Дашиевич Цыреновэй хэлэһээр, захиргаанай шухалай һалбаринуудай нэгэн хадаа ажалшадые бүридхэлгэ болоно.
«Олоной ойлгоһоор, кадрова бодолгын һалбарида хубилалтанууд болоно. Илангаяа залуушуулай энээниие ойлгохонь шухала. Тэдэнэр танил, түрэл гаралай ашаар бэшэ, харин урагшаа һанаатай, бэрхэ мэргэжэлтэд байбал, хүгжэн ургаха аргатай. Буряад Уласай Арадай Хуралда хүдэлһэндөө баяртайб. Суг хүдэлһэн нүхэдтөө баяраа мэдүүлнэб. Саашадаа таанадай дэмжэлтэдэ найданаб. Хэхэ ажалнай ехэ. Алексей Самбуевичай хэлэһээр, эдэй засагай хүгжэлтэ эршэдүүлхэ. Ехэ хэрэгүүдые һанал нэгэн бүлэг хүнүүд бүтээдэг. Уласай хүгжэлтын түлөө ажалаа ябуулхабди», - гэжэ тэрэ тэмдэглэбэ.
Буряад Уласай Толгойлогшо Алексей Цыденов ноябриин 26-да Баир Цыреновые Толгойлогшын болон Засагай газарай захиргаанай хүтэлбэрилэгшын тушаалда дэбжүүлһэн байна. Ноябриин 29-дэ Баир Цыренов Буряад Уласай Засагай газарай Түрүүлэгшын орлогшын тушаалда томилогдожо, ноябриин 30-да Арадай Хуралай һунгамалһаа болиһон юм гэжэ һануулнабди.
Энээнһээ урид Буряад Уласай Толгойлогшын захиргаанай хүтэлбэрилэгшын тушаалда хүдэлжэ байһан Пётр Носков октябриин 3-һаа Толгойлогшын зүблэгшын тушаалда томилогдоо. Тиимэһээ Буряад Уласай Засагай газарта хубилалтанууд болобо.
Анна Огороднигой гэрэл зураг.
