Буряад хэлэ хүгжөөхэ тухай тусхай программа аймаг бүхэндэ зохёогдожо, бэелүүлэгдэхэ ёһотой. Теэд нютагай һан жасада мүнгэнэй багаһаа боложо, энэ ажал ябуулхань хүшэрхэн байха. Тиимэһээ буряад хэлэ хүгжөөхэ талаар гүрэнэй программада һомологдодог мүнгэ аймагуудта дамжуулбал, яһала үрэ дүнтэй байха һэн. Буряадай гүрэнэй ехэ һургуулиин Зүүн зүгэй дээдэ һургуулиин буряад хэлэ хүгжөөхэ түбэй багшанар хэдэн аймагуудаар ябажа, уулзалгануудые, түхэреэн шэрээнүүдые үнгэргэһэнэйнгөө удаа иимэ бодолнуудаараа хубаалдана.
Аша үрэтэй уулзалганууд
Ноябрь һарын һүүл багаар Баргажан, Хурамхаан аймагуудта удха ехэтэй уулзалганууд үндэр хэмжээндэ эмхидхэгдээ. Педагогикын эрдэмэй кандидат Ольга Бальжинимаевна Бадмаевагай хэлэһээр, хоёр үдэрэй туршада ехэ ажал ябуулагдаһан байна.
- Нэн түрүүн бидэ Баргажанда олониитэтэй уулзалга үнгэргөөбди. Аймагай засаг баригшадай хөөрэлдөөндэ хабаадаһаниинь һайшаалтай. Баргажан аймагай засаг дарга Алексей Балуев, дасанай шэрээтэ лама Цырен Намжилов, аймагай һунгамалнуудай зүблэлэй хүтэлбэрилэгшэ Зорикто Сундаров гэгшэд һанамжануудаа хэлэжэ, суглаа һонирхолтой болгоо, - гэжэ Ольга Бальжинимаевна хөөрэнэ. - Буряад угсаатанай үсөөнөөр ажаһуудаг Адамово, Юбилейный, Суво һууринуудай түлөөлэгшэдэй буряад хэлэ хүгжөөлгэ тухай өөрынгөө һанамжануудые хэлэхэдэнь, һонирхолтой байгаа.
Хоёрдохи үдэртэнь иимэ уулзалга Хурамхаан аймагта эмхидхэгдэһэн байна. Аяар Улаан-Үдэһөө ерэһэн хүндэтэ багшанарые, эрдэмтэдые хурамхаанаархин угтан абажа, олон хүнүүдэй хабаадалгатай хэдэн талмай бэлдэһэн байна.
- Үглөөнһөө бидэ табан талмайда хубааран, ажалаа ябуулаабди. Нэгэдэхи талмай дээрэ хүүгэдэй сэсэрлигэйхид сугларжа, эрхим багшанарай нээмэл хэшээлнүүдтэ хабаадаба. Удаадахи талмайнуудта эхин ангинуудай багшанар, дунда һургуулида буряад хэлэ заадаг мэргэжэлтэд дүй дүршэлөөрөө хубаалдаһан байна. Үхибүүдэй 9-дэхи болон 11-дэхи анги дүүргэжэ, гүрэнэй шалгалта барилгада гол анхарал хандуулагдаа. Булта суглараад, үглөөнһөө ябуулһан ажал тухайгаа үдэһөө хойшо хэлсээбди, - гэжэ Ольга Бадмаева хөөрөөгөө үргэлжэлүүлнэ. – Аймагуудаар ябахадаа, багшанартаа туһа болгон, методическа семинарнуудые хээд гаранабди. Һүүлэй үедэ ямар онол арганууд бии болоноб, методикын болон заалгын талаар шэнэ һэбшээн, хубилалтанууд тухай хөөрэжэ, заажа үгэнэбди. Энэ ажалда уласаймнай түрүү багшанар хабаадуулагдажа, зааха талаар мастер-классуудыеүнгэргэнэ.
Яагаад буряад хэлэ үзэхэб?
Нүүдэл иимэ суглаанууд Сэлэнгэ болон Ивалга аймагуудта урид эмхидхэгдэһэн юм. Уласай бюджедһээ энэ хэрэгтэ хараалагдадаг грантда хүртэһэн буряад хэлэ хүгжөөлгын түбэй мэргэжэлтэд аргагүй ехэ ажал ябуулна гэжэ тэмдэглэмээр.
Буряадай ехэ һургуулиин Зүүн зүгэй дээдэ һургуулиин захиралай нэгэдэхи орлогшо Гарма-Ханда Гунжитовагай хэлэһээр, энэ хэмжээ ябуулгануудай үедэ буряад хэлэ заалгын талаар олон бэрхэшээлнүүд, шиидхэгдээгүй асуудалнууд гараадхина гэжэ нютаг бүхэнэй багшанар, түрэлхид нэгэ дуугаар мэдүүлнэ.
Хаа-хаанагүй буряад хэлэ түрэл хэлэнэй гуримаар заадаг һуралсалай гуламтанууд үсөөрнэ гэһэн гомдолтой мэдээнэй үдэр бүри дуулдахадань голхоролтой.
- Долоон хоногто табан үдэр ажаллаха гэжэ һургуулинууд мүнөө үедэ оролдоно ха юм. Буряад хэлэ түрэл хэлэнэй гуримаар заалгада 5-6 саг үгтэнэ. Тиимэһээ багшанар энэ программа табан хоног соо бэелүүлжэ шаданагүй бшуу. Теэд буряад хэлэ гүрэнэй программаар заахада, холо бэлэн ааб даа, - гэжэ Гарма-Ханда Цыбикжаповна мэдүүлнэ.
Улаан-Үдэдэ дүтэ оршодог Ивалга аймагта хүдөөһөө буряадууд олоор нүүжэ ерэнэ гэжэ бултанда мэдээжэ. Тиимэһээ Улаан-Үдэ шадархи һууринуудай һургуулинуудта буряад хэлэ түрэл хэлэнэй гуримаар заабал, ямар гоё байгааб даа.
Энээнһээ гадна үндэһэн буряад заншалтай олон нютагуудта түрэл хэлэеэ болюулһаниинь ехэ харамтай. Тэрэниие гэдэргэнь бусааха тухай асуудал аймаг бүхэндэ бодхоогдоһон байна.
Һургуулинууд түрэлхидэй тала барин, һайшаалда хүртэдэггүй энэ байдалда ороно гэхээр. Юуб гэхэдэ, зарим түрэлхид, ниитын ажаябуулагшад үзэхэмнай, болихомнайшье гэжэ байгаад, элдэб шиидхэбэринүүдые абана ха юм. Жэшээлбэл, хэдэн жэлэй саада тээ Баргажан аймагта түрэлхидэй үүсхэлээр буряад хэлэ үзэхэгүй тухай ажал ябуулагдаһан байна.
- “Буряад хэлэ үзэхэеэ болиёо!”, “Үзэлгэ уялгата бэшэ юм, бидэ өөһэдөө шэлэхэ эрхэтэйбди” гэжэ байгаад шанга уряанууд, асуудалнууд табигдаа бэлэй. Харин буряад угсаатан Баргажанда үсөөншье һаа, “юундэ түрэл хэлыемнай үлүү үзөөбта” гэһэн зүрилдөөн боложо, ехэ хурсаар үнгэрөө гэжэ дуулаһан байнабди. Тиимэһээ бидэ Баргажан гарахадаа, һанаагаа зобон ошоо һэмди, - гэжэ Гарма-Ханда Гунжитова хэлэнэ. - Суглаа эмхидхэхэдэмнай, “бидэ үзэхөө һананагүйбди” гэһэн хүнүүд үнэн дээрээ олдоогүй. Аймагай засаг баридаг дарганар бултыемнай ехэ анхаралтайгаар шагнажа, эдэбхитэйгээр хэмжээ ябуулгадамнай хабаадалсаһан байна. Аймагай һуралсалай таһагай дарга өөрөө ород хүн байбашье, заалгын талаар ямар шиидхэгдээгүй асуудалнууд байнаб гэжэ яһала ойлгожо байһанаа харуулаа. Тэрэ элидхэл соогоо бэрхэшээлнүүдые бүхыгөөрөө дайража, сэхыень хуу дуулгаа. Баргажанай уулзалгын дүн гэбэл, буряад хэлэ үзэхэ гү, али үгы гү гэжэ асуудал гаргаха хэрэггүй, заалгын талаар ажал суг хамта ябуулхабди гэжэ хэлсээбди.
Олоной хүсөөр
Уулзалгануудта эрид хурсаар табигдаһан асуудалнуудые шиидхэхын тула ганса буряад хэлэнэй багшанартай хөөрэлдөөд үнгэршэхэ бэшэ, мүн аймагуудай захиргаанай хүтэлбэрилэгшэдтэй, һуралсалай таһагуудай дарганартай уулзажа, суг хамтын шиидхэбэри гаргаха хэрэгтэй болоно бшуу. Тиигэжэ иимэ ажалай ашаар нютаг бүхэндэ тусхай программа зохёогдохоор хараалагдана. Энэ хэлсээндэ Буряадай гүрэнэй ехэ һургуули, Буряад Уласай Болбосоролой ба эрдэм ухаанай яаман болон аймагуудай захиргаанууд оролсохо гэжэ тэмдэглэе.
- Хөөрэлдөөд үнгэршэхэгүйн тула манай түб шэнэ үүсхэл гаргаһан байна. Гурбан талын хэлсээ баталха һанаатайбди. Хэлсээнэй ёһоор, тус данса доро гараа табиһан тала бүхэн бэе дээрээ буряад хэлэ хүгжөөхэ талаар тусхай уялгануудые даажа абана. Өөрынгөө шэглэлээр оролдосотойгоор тала бүхэн ажал ябуулха бэзэ гээд найдагдана, - гэжэ Гарма-Ханда Цыбикжаповна шэнэ үүсхэлтэеэ танилсуулна. – Манай Буряадай ехэ һургуули, илангаяа манай түб, эрдэм ухаанай, методическа онол аргын талаар туһаламжа үзүүлхэ, багшанартай нягта харилсаа холбоотойгоор хүдэлэн, заалгын ажал һайжаруулха алхамуудые хэхэ, мүн бусадшье шухала уялгануудые бэе дээрээ даажа абаха түсэбтэйбди.
Болбосоролой болон эрдэм ухаанай яаман баһа өөрын уялгатай болохо юм. Манай һалбари дүүргэһэн оюутадые ажалаар хангаха, багшанарай мэргэжэл дээшэлүүлгын хэмжээ ябуулгануудые эмхидхэжэ байха болонод. Мүн ном судар суг хамта гаргабалнай, һайн байгаа.
Һургуулинуудаа дэмжэхэ, түрэлхидтэй ажал ябуулха, буряад хэлэ заалгада үгтэһэн саг бага болгохогүй, буряад хэлэ үзэжэ байһан үхибүүдэй тоо үсөөрүүлэнгүй, бүри дээшэлүүлхэ талаар ажал ябуулха тухай аймаг бүхэнэй захиргаан һанаата болохо ёһотой.
Теэд аймаг бүхэндэ хэды программа абабашье, тэрэнь мүнгэгүйгөөр бүтэхэгүй ха юм. Буряад хэлэ хүгжөөлгын гүрэнэй программын мүнгэн хүдөө нютагта хүрэнэгүй.
- Буряад хэлэ хүгжөөхэ зорилготой олон тоото хэмжээ ябуулганууд эмхидхэгдэнэ, грантын мүнгэн һомологдоно, номууд хэблэгдэнэ гэжэ байгаад оройдоол хүдөөгэй зон мэдэнэгүй. Энэнь ехэ харамтай. “Эдэ бүгэдэ ажал хэндэ, юундэ хэнэбибди?” гэһэн асуудал гараадхина. Юуб гэхэдэ, буряад хэлэ хүгжөөхэ хүнүүднай хүдөөдэ ажаһууна бшуу. Тиимэһээ гүрэнэй программын мүнгэнһөө ямаршьеб даа аргаар хүдөөдэ үгэлсэхэ байгаал даа, - гэжэ Гарма-Ханда Гунжитова һанамжална.
Номууд дуталдаһаар
Тэрэл гүрэнэй программын ёһоор, 4-5 сая түхэриг ном хэблэлгэдэ һомологдоно. Түбэй мэргэжэлтэдэй хэлэһээр, үнэн дээрээ энэ тиимэ ехэ мүнгэн бэшэ гээшэ. Ушар гэхэдэ, ганса буряад хэлэ болон уран зохёолой номууд табан жэл болоод лэ һэлгэгдэжэ байха ёһотой гэжэ хиналтын албан, илангаяа санэпиднадзор мэдүүлнэ.
- Энэ ганса буряад хэлэ болон уран зохёолой номуудта бэшэ, мүн бүхы һуралсалай номуудта хабаатай гэжэ хэлэхээр. Аймагуудай һургуулинуудаар ябахадаа, буряад хэлэнэй номууд 10 гаран жэл хэрэглэгдэжэ байна гэжэ хараабди. “Тиимэ номуудые үхибүүдэй гарта барюулха ёһогүйбди, аюултай” гэжэ багшанар мэдүүлнэ. Хэды тиигэбэшье, номгүйһөө боложо, тэдэ хэшээлнүүдтээ хуушан юумэ хэрэглэхэ баатай болоно бшуу, - гэжэ Гарма-Ханда Цыбикжаповна байдалһаа яагаад гарахаб гэжэ һанамжална. – Орёо энэ байдалые нэгэ бага һайжаруулхын тула ном хэблэлгэдэ бюджедһээ ондоо аргаар мүнгэ һомолхо хэрэгтэй гээд һанагдана. Юуб гэхэдэ, буряад хэлэ хүгжөөлгын программын үгы һаань, номуудые яагаад гаргаха байгаа хүмди?
Буряадай гүрэнэй ехэ һургуулиин буряад хэлэ хүгжөөлгын түбэй мэргэжэлтэдэй, эрдэмтэдэй бодхоожо байһан хүшэр асуудалнуудые Засагай газарай хүтэлбэрилэгшэд хараадаа абажа, бүхы хүсэ шадалаа хамтаруулан хүдэлжэ, гараад байгаа бэрхэшээлнүүдые усадхаха бэзэ гээд найдагдана.
Борис БАЛДАНОВ