866
Буряад Уласай ажаһуугшад эгээл дуратай эмшэнээ смс-һунгалтаар элирүүлбэ.
Хоёрдохи жэлээ эмхидхэгдэжэ байһан уласай хэмжээ ябуулга «Мир» радиостанци болон Буряадай Эмшэлэлгын танхимай үүсхэлээр үнгэргэгдэнэ. Энэ мүрысөөн ажалдаа үнэн сэхэ, үгэһэн тангаригаа нэгэшье алдангүй, хүн зониие эмэй, үгын, һайн хандалгын хүсөөр ажаһуугшые эмшэлжэ, тэдэнэй хүндэдэ хүртэһэн эрхим эмшэдые элирүүлхэ зорилготой үнгэргэгдэнэ.
Байгша оной октябриин 23-һаа декабриин 15 болотор Буряад Уласай ажаһуугшад смс-голосованиин хүсөөр дуратай эмшэдэйнгээ түлөө дуугаа үгэһэн байна. «Минии дуратай эмшэн» гэһэн уласай шангай эмхидхэгшэдэй хэлэһээр, энэ мүрысөөн эмшэдэй дунда эрхимүүдые элирүүлжэ, тэдэниие урмашуулха, олондо мэдүүлхэ зорилготой юм.
Буряад Уласай ажаһуугшадай элирүүлһэн эрхим эмшэдые шагнал 2017 оной декабриин 19-дэ Буряадай Эмшэлэлгын танхимда үнгэрһэн байна. Энэ мүрысөөндэ илагшадай түлөө 10 мянганһаа дээшэ ажаһуугшад дуугаа үгөө. Тиихэдэ 209 эмшэдэй түлөө 16 мянган ажаһуугшад смс-һунгалтада хабаадаа. Буряад Уласай «Минии дуратай эмшэн» гэһэн шангай түрүүшын һуури Ивалга аймагай Оронгын амбулаториин даагша Соном Субанович Галсанов эзэлбэ, тэрэнэй түлөө 4091 хүн дуугаа үгэһэн байна. 2-дохи, 3-дахи һууринуудта Семашкын нэрэмжэтэ Буряад уласай клиническэ больницын эмшэд Владислав Эдуардович Борисов болон Булат Петрович Шоболов эзэлбэ, тэдэнэй түлөө 3504 болон 2714 ажаһуугшад дуугаа үгэбэ.
«Манай таһагай ажал үндэрөөр сэгнэһэнэй түлөө баяраа мэдүүлнэб! Бидэ үбшэнтэнөө шэнэ эгээр эрхим, мүнөө үеын эрилтэнүүдтэ таараһан хэрэгсэлнүүдэй ашаар аргалнабди», - гэжэ Семашкын нэрэмжэтэ больницын эмшэн Владислав Борисов хэлэбэ.
