931
Засагай газарай эмхинүүдэй «Импульс» гэһэн ниигэмэй зар тунхаг тараалгын (реклама) Бүхэроссиин мүрысөөндэ Буряад уласай эмшэлэлгын эмхинүүд амжалта туйлаба.
«Россия сегодня» гэһэн мэдээсэлэй уласхоорондын агентство энэ мүрысөө эмхидхэжэ, баяр ёһололой оршондо илагшадые амаршалба. Мүрысөөнэй хэмжээндэ найман гол болон зургаан тусхай номинацинуудта лауреадууд элирүүлэгдээ. Баярай хэмжээ ябуулгада шүүгшэд, федеральна болон уласай засагай газарай түлөөлэгшэд, реклама тараагшад болон олондо мэдээсэл тараадаг хэрэгсэлнүүдэй түлөөлэгшэд хабаадаба.
Ородой Холбоото Уласай холбоо болон олонтой харилсаанай сайдай орлогшо Алексей Волин видеохандалгаар сугларагшадые амаршалһан байна.
2017 оной мүрысөөнэй эмхидхэлэй хороондо Ородой Холбоото Уласай бүхы федеральна тойрогуудай болон СНГ-н гүрэнүүдэй засагай газарнуудһаа мүрысөөндэ хабаадаха тухай 1500-һаа дээшэ мэдүүлгэнүүд ороһон байна гэжэ тэмдэглэлтэй. 2016 оной октябриин 1-һээ 2017 оной сентябриин 18 болотор ниигэмэй реклама харуулһан кампанинууд мүрысөөндэ хабаадаһан байна. Олондо мэдээсэл тараадаг хэрэгсэлнүүдэй хүтэлбэрилэгшэд, зар тунхаг тараалгын һалбариин хүтэлэгшэ түлөөлэгшэд, засагай газарай түлөөлэгшэд мэргэжэлтэ шүүбэришэдэй тоодо ороо.
«Будь здоров!» гэһэн тусхай номинацида «Сдай кровь - спаси жизнь!» гэһэн ажалай түлөө Буряадай шуһа тушаалгын станци илаба. «Лучшая рекламная кампания» гэһэн номинацида «Мы за здоровое сердце!» гэһэн ажалай түлөө Буряад Уласай Эмшэлэлгын һэргылэмжын хотын түб 3-дахи һуури эзэлбэ.
Буряад Уласай Элүүрые хамгаалгын яаманай сайтһаа гэрэл зураг абтаба.
