738
Буряад Уласай һурагшад гүрэнэй ниитэ нэгэ шалгалта тушааха зүбшөөлтэй болохын тула декабриин 6-да дүн гаргалгын найруулга бэшэбэ.
Буряад Уласай 5548 һурагшад дүн гаргалгын найруулга бэшээ. Энэ хэмжээ ябуулгада хабаадаһан һурагшадай 98 хубинь амжалтатайгаар ажалаа дүүргэбэ. Оройдоол 1,5 хубинь “муу” гэһэн сэгнэлтэ абаһан байна. Эрэмдэг бэетэй үхибүүд найруулга бэшэ, харин изложени бэшэхэ аргатай байгаа. Тиимэһээ 243 шабинар изложени бэшэжэ, оройдол нэгэ һурагша “муу” сэгнэлтэ абаһан байна.
2017-2018 оной һуралсалай жэлдэ найруулга бэшэхэ табан һалбари зүблэлэ элирүүлһэн байна. Нэрлэбэл, «Верность и измена», «Равнодушие и отзывчивость», «Цели и средства», «Смелость и трусость», «Человек и общество» гэһэн сэдэбүүдээр һурагшад найруулга бэшэхэ аргатай байгаа. Тиихэдэ ехэнхи һурагшад «Равнодушие и отзывчивость» гэһэн сэдэбүүдээр хүдэлмэринүүдые бэшээ. Дүн гаргалгын найруулга бэшэхэ үедэ дүрим эбдэхэ ушар дайралдаагүй.
Ородой Холбоото Уласай Болбосоролой һалбари хинадаг эмхиин мэдээсэһээр, дүн гаргалгын найруулга 645 мянганһаа дээшэ һурагшад бэшэһэн байна. Тэдэнэй 642 мянганһаа дээшэниинь 2018 ондо һургуули түгэсэшэгшэд болоно. Ерэхэ жэлдэ һургуули дүүргэхэ һурагшадай 0,67 хубинь хэрэгтэй хэмжээнэй найруулга бэшээгүй, 0,77 хубинь өөһэдөө бэшээгүй гэжэ бүридхэлдэ абтаа. Дүн гаргалгын изложени 13 мянган һурагшад бэшэһэн юм. Тэдэнэй 98 хубинь гүрэнэй ниитэ нэгэ шалгалта тушааха зүбшөөлтэй болобо.
“Муу” сэгнэлтээр гү, али алибаа нэгэ шалтагаанаар найруулга бэшээгүй һурагшад 2018 оной февралиин 7-до болон майн 16-да шалгалта бэшэхэ аргатай.
