634
2017 ондо ган гасуур, бороо хура багатай жэл тохёолдожо, Ородой Холбоото Уласай 18 можо нютагуудай хохидолдо ороһон хүдөө ажахы эрхилэгшэд тэдхэмжэдэ хүртэхэ. Тэдэнэй тоодо Буряад Улас бүридхэлдэ ороһон байна.
2017 оной декабриин 14-дэ Ородой Холбоото Уласай Засагай газарай суглаанда абтаһан шиидхэбэриин ёһоор, Буряад Уласта 97,5 сая түхэриг мүнгэн тэдхэмжэ үзүүлэгдэхэ.
«Ган гасуурһаа хохидоһон Буряад Уласай хүдөө ажахы эрхилэгшэдтэ 2017 оной дүүрэтэр мүнгэн тэдхэмжэ үзүүлэгдэхэ. Уласай хүдөө ажахы эрхилэгшэдһээ 91 мэдүүлгэ оронхой», - гэжэ Буряад Уласай Хүдөө ажахын болон эдеэ хоолой сайдай орлогшо Юлия Дагданова хэлэбэ.
Ган гасуурта хохидоһон ажахынуудай гарза тоолоһон дансануудай ёһоор, хүдөө ажахы эрхилэгшэд 195,5 сая түхэригэй гарзада ороо гэжэ бүридхэлдэ абтаа. Гараһан гарза хааха хэрэгтэ Ородой Холбоото Уласай Засагай газарай тогтоолоор, Буряад Уласта 97,5 сая түхэриг һомологдоо.
2017 ондо ган гасуурай талаар Буряад Уласта онсо байдал соносхогдоо гэжэ һануулнабди. Тиихэдэ 49,3 мянган га талмайда талха таряа, үбһэ ногоон шатаһан байна. 2016 оной мэдээгээр 69,7 мянган га талмайда таряалан хохидоо.
