​Хүүгэдые баярлуулха буянтай

Буянто Осоров, Анатолий Цыденов

Хаа-яагүй Шэнэ жэлые угталгын бэлэдхэл түлэг дун­даа. Олоной ябадаг талмайнуудта, сэсэрлигүүдтэ мүнхэ ногоон хасууринууд табигдажа, шэмэглэн гоёогдоно.

Манай сурбалжалагша Сергей Орешковэй нэрэм­жэтэ сэсэрлиг ошожо, ямар ажалай ябуулагдажа байһые хараа.

Урданһаа хойшо Буряадай түрүүшын гигант гэгдэһэн Паровоз-вагон бүтээлгын заводой ажалшадай гэр бүлөөрөө амаржа сэнгэдэг эгээл дуратай газарынь Сер­гей Орешковэй нэрэмжэтэ сэсэрлиг һэн. Мүнөөшье тэрэ бүхы Железнодорожно хоро­лой хүн зоной амардаг, сэн­гэдэг дуратай газарынь юм.

Мүнөө гол талмайдань гоёор шэмэглэгдэһэн ха­суури мантайна. Тойруулаад урашуул мүльһэн дүрсэнүүдые урлана. Зан­шалта ёһоороо Жабар үбгэн Саһан хүүхэнтэеэ урлагдана. Гараха жэлэй һүлдэ – Нохой омогтойгоор урлагдаа. Са­лир мүльһөөр бүтээгдэһэн бэшэшье амитад, хүүгэдэй дуратай Щелкунчик уринаар харагдана.

Энэ декабриин хүйтэндэ хоёр урашуул уран гоё­ор урлажа, салир хүйтэн мүльһэндэ ами оруулна. Буряадай соёлой габьяата хүдэлмэрилэгшэ, арадай дархан Анатолий Цыденов хуша модоор урладаг юм.

- Хуша модомнай ехэ ду­лаахан юм даа. Тэрээгээрээ ажал хэжэ байхадаа, һанаа сэдьхэл тэниидэг, досоо урма зориг түрэдэг, - гэжэ Анатолий Александрович хөөрэнэ.

- Харин теэд энэ хүйтэн мүльһөөр яажа хүдэлнэт? – гэжэ һонирхобоб.

- Мүльһэн хүйтэншье хадаа, һайханаар урлажар­хибал, ами ородог юм. Теэд баһа нэгэ мууниинь гэхэдэ, дулаархада хайлажа үгы бо­лошохо зүйл гээшэ. Тэрэнь харамтай. Тиибэшье, үбэлэй хүйтэндэ хүүгэдые баярлу­улха гээшэ баһал нэгэ жар­гал юм даа, - гэжэ урлагша баярлана.

Харин Буянто Осоров уран нүхэрынь хүрэлөөр ур­ладаг габьяатай. Тон түрүүн уран барималша тоһон ша­бараар дүрсэ байгуулна. Ти­игээд мастерскойдо абаа­шажа, хүрэлөөр шудхуулдаг. Буянто баһал хүүгэдые баярлуулха бэлигтэй, буянтай байһандаа баяртайб гэжэ мэдүүлнэ.

Сэнгэ РИНЧИНОВ