684
Үнгэрһэн жэлэй һүүл багта Байгал шадарай аймагай Ильинка һууринда эхин классуудай һургуули нээгдэбэ.
Һургуули нээлгын баяр ёһололой хэмжээ ябуулгада Буряад Уласай Толгойлогшо Алексей Цыденов, Буряад Уласай Болбосоролой болон эрдэм ухаанай сайд Баир Жалсанов, Байгал шадарай аймагай хүтэлбэрилэгшэ Сергей Семёнов, багшанар, түрэлхид болон һурагшад хабаадаба.
Эхин классуудай һургуулида заһабарилгын ажалнууд сентябрь һарада эхилжэ, гурба һарын туршада хэгдэбэ. «Ородой Холбоото Уласай можо нютагуудта юрэнхы болбосоролой эмхи зургаануудта һуралсалай һууринуудые байгуулгые дэмжэлгэ» гэһэн федеральна программаар 36,4 сая түхэриг заһабарилгада һомологдоһон байна.
Байгал шадарай аймагай Ильинкын заһабарилагдаһан һургуулида шэнэ жэлэй гарахаһаа урид Буряад Уласай Толгойлогшо сугларагшадые амаршалба. «Һаруул, дулаан, уужам һургуулитай болобот. Манай үхибүүд иимэ һургуулинуудта һураха ёһотой», - гэжэ Алексей Цыденов хэлэбэ. Уласай хүтэлбэрилэгшын хэлэһээр, 2018 ондо интерактивна самбар, мультимедийнэ проектор болон компьютер Ильинкын һургуулида бэлэг болгон дамжуулагдаха.
Хэдэн жэлэй туршада хэрэглэгдээгүй байшанда заһабарилгын ажалнууд хэгдэжэ, Ильинкын эхин классуудай һургуули байшантай болобо. Гурбан жэлэй саана энэ байшан аюултай гэжэ тоологдоһон юм. Тиигэбэшье байшанай хушалта, зайн галай, дулаасуулгын, уһанай соргонууд шэнэлэгдэжэ, гадаа талаһаань болбосон түхэлтэй болгогдоо. Һургуулиин досоо талада шэрдэлгэ, будалгын ажалнууд хэгдээ, үүдэн, сонхонууд, шала шэнэлэгдээ, түймэрэй гараһан тухай дуулгаха шэнэ системэ тодхогдоһон байна.
«Энэ һургуулида зургаан эхин классуудай 250 үхибүүд нэгэ ээлжээндэ һураха. Гүрэнэй болбосоролой федеральна эрилтэнүүдтэ тааруу болоһондоо баяртайб», - гэжэ һургуулиин захирал Ирина Шараганова тэмдэглэбэ.
Ахалагша классуудай һургуулида тамирай танхим заһабарилагдаа. Энэ хэрэгтэ хүдөө нютагуудай һургуулинуудта бэе һорихо оршон байгуулха, спорт хүгжөөхэ гэһэн федеральна түсэлэй хэмжээндэ 2,9 сая түхэриг һомологдоһон байна.
Байгал шадарай аймагай Ильинкын һургуулида 690 үхибүүд һурадаг. 2014 онһоо хойшо эхин классуудай һурагшад хоёр ээлжээндэ һуража байгаа.
Буряад Уласай Толгойлогшо Алексей Цыденовэй хэлэһээр, улас дотор илангаяа гурбадахи ээлжээндэ һурахаяа болихо талаар асуудал һаяын жэлнүүдтэ шиидхэгдэхэ. «2018 ондо һургуулинуудые барижа эхилхэбди. 2019 ондо гурбадахи ээлжээндэ һурахаяа болихо гэһэн зорилготойбди. Оролдосотойгоор, һайнаар һурагты, эрдэм мэдэсэ үлүү гэжэ байдагггүй», - гэжэ уласай хүтэлбэрилэгшэ үхибүүдтэ хандаба.
2017 ондо Улаан-Үдын 113-дахи кварталда оршодог 63 дугаар һургуулида залгалаа байшан болон Захаамин аймагай Ёнгорбой нютагта 100 үхибүүдэй һураха һургуули баригдаа. Буряадай ниислэл хотын 112-дохи кварталда 2017 ондо һургуули баригдажа эхилһэн байна. Тэрэ барилгань 2018 ондо дүүрэхэ. Тиихэдэ байгша ондо Ивалга аймагай Гүрүльбэ һууринда 450 үхибүүдэй һураха һургуулиин барилга эхилхэ.
