921
Һурагшадые шэрэхэ автобусуудые һургуулинуудта дамжуулха баяр ёһололой үедэ Буряад Уласай Толгойлогшо Алексей Цыденов 2018 ондо болбосоролой эмхинүүдэй парк шэнэлхэ талаар ажал үргэлжэлүүлэгдэхэ гэжэ хэлэбэ.
Ородой Холбоото Уласай можо нютагуудай дунда 2017 ондо болбосоролой эмхинүүдтэ федеральна һанһаа һомологдоһон мүнгөөр абтаһан автобусуудай тоогоор Буряад Улас гурбадахи һуури эзэлнэ.
«Уласай һургуулинууд автобусуудтай болоһон баяраар амаршалнаб. 2107 оной дүнгүүдээр 64 автобусууд абтаа. Уласай һанһаа һомологдоһон мүнгөөр 25 автобус, федеральна бюджедһээ – 39 автобус худалдан абтаа. Ородой Холбоото Улас дотор худалдан автобусуудай тоогоор Буряад Улас 3-дахи һуури эзэлнэ», - гэжэ Алексей Цыденов хэлэбэ.
2017 оной дүнгүүдээр Буряадта 10-12 һууритай - 14 автобус, 17 һууритай - 11 автобус, 22 һууритай 14 автобус худалдан абтаһан байна. Һурагшадые шэрэхэ унаа худалдан абалгада Ородой Холбоото Уласай Засагай газарай нөөсын жасаһаа 77 можо нютагуудай болбосоролой эмхинүүдтэ 3 миллиард түхэриг һомологдоо. Ород гүрэнэй машина үйлэдбэрилдэг эмхинүүдһээ, нэрлэбэл, хизаарламал харюусалгатай «Автомобильный завод «ГАЗ», «Форд Соллерс Холдинг», «Павловский автобусный завод», «Курганский автобусный завод», «Волгабас» бүлгэмүүдһээ 39 автобус абтаа.
Буряад Уласай «Болбосорол болон эрдэм хүгжөөлгэ» гэһэн Гүрэнэй программаар 2017 ондо 22 һууритай 25 «Газель» түхэлэй унаа абтаһан байна. Эдэ автобусуудые худалдан абалгада уласай болон нютагай засагай газарай байгууламжануудай һанһаа 33,6 сая түхэриг гаргашалагдаа.
Үхибүүдые харгыда аюулгүйгөөр шэрэхын тула автобусууд ГЛОНАСС, тахограф болон бусад хэрэгсэлнүүдээр хангагданхай. 2018 ондо болбосоролой эмхинүүдэй машинын парк шэнэлхэ талаар ажал үргэлжэлүүлэгдэхэ. Энэ хэрэгтэ уласай бюджедтэ 16 автобус худалдан абаха 22 сая түхэриг мүнгэн хараалагданхай. Тиихэдэ уласай засаг зургаан нютагай засагай байгууламжануудта хамта энэ талаар ажал ябуулха, уласай һанһаа 70 хуби мүнгэн, нютагай һанһаа 30 хуби мүнгэн гаргашалагдаха юм.
Мүнөө Буряад Уласта 184 гүрэнэй болон нютагай болбосоролой эмхинүүдтэ 238 автобусаар үхибүүд хүрэдэг. Улаан-Үдын 8 болон 44 дугаар һургуулинууд шэнэ автобустай болонхой.
