774
Үсэгэлдэр, январиин 15-да, Буряадай ниислэл хотодо эрье зубшаһан гудамжа болбосон түхэлтэй болгохо талаар уридшалан хэгдэһэн түсэлнүүдэй мүрысөөн соносхогдобо. Мэргэжэлтэ шүүбэришэд эрхим гурбан ажалнуудые шэлэжэ, гурбан түсэлһөө һайхашааһанаа ажаһуугшад һунгалтын хүсөөр элирүүлхэ аргатай.
«Улаан-Үдын ажаһуугшад һайхашааһан түсэлэй түлөө дуугаа үгэхэ юм. Тиимэһээ зохёохы бэлиг талаантай хүнүүд мэргэжэлээ дээшэлүүлэнгээ, мүрысөөндэ хабаадаха», - гэжэ Буряад Уласай Толгойлогшо Алексей Цыденов хэлэбэ.
Жэлэй туршада эрье зубшаһан гудамжын эрхим түсэл элирүүлэгдэжэ, түсэблэлгэ, барилга-хабсаралгын ажалай сэн элирүүлхэ талаар ажал хэгдэхэ.
«Байгша ондо эндэ хубилалтанууд болохо», - гэжэ уласай хүтэлбэрилэгшэ тэмдэглэбэ.
Улаан-Үдэ хотын захиргаанай архитектура болон хото барилгын хороон тус мүрысөө эмхидхэн үнгэргэхэ. Буряад Уласай Барилгын болон гэр байрын ажахы шэнэдхэлгын яаман эрхим түсэл элирүүлһэн мүрысөө хинажа байха юм.
Энээнһээ урид Буряад Уласай Толгойлогшо Алексей Цыденов Буряад уласай Барилгын болон гэр байрын ажахы шэнэдхэлгын болон Байгаалиин нөөсэнүүдэй яамануудай, Улаан-Үдын захиргаанай түлөөлэгшэдэй хабаадалгатайгаар Үдэ, Сэлэнгэ голнуудай эрьедэ нүүдэл суглаа үнгэргэһэн байна. Тэдэнэр Одигитриевскэ сүмэһөө атовокзал хүрэтэр ябажа, байгаали хамгаалгын, эдэ газарнуудые бог шоройһоо сэбэрлэлгэ гэхэ мэтэ асуудалнуудаар зүбшэн хэлсэбэ.
Тиихэдэ Сэлэнгэ мүрэндэ бог шорой суглуулдаг урадхалаар асарагдаһан олтирогуудые арилгаха тухай даабари Алексей Цыденов үгэбэ.
«Хүнүүдэй ябагаар ябажа амарха газар бариха, хүгжөөхэ талаар арга боломжонуудые хэлсээбди. Багахан ресторан, амарха һандалинуудые барижа, сэсэрлигүүдые тарижа, хүн зоной амархада зохид байха», - гэжэ Буряад Уласай Толгойлогшо Алексей Цыденов хэлэбэ.
Буряад Уласай Засагай газарай мэдээсэлэй албанһаа гэрэл зураг абтаба.
