767
Байгша оной январиин 13-да Ородой Холбоото Уласай хэблэл мэдээсэлэй мэргэжэлэй һайндэр үнгэрһэн байна. Энээндэ дашарамдуулан, Буряад Уласай Толгойлогшо Алексей Цыденов январиин 15-да сэтгүүлшэдэй дунда үнгэргэгдэһэн «Хамаг Буряад орон» гэһэн уласай мүрысөөндэ илагшадые амаршалба.
«Таанадые мэргэжэлэй һайндэрөөр амаршалнаб. Ород гүрэн дотор манай сэтгүүлшэд эгээл эдэбхитэйнүүдэй тоодо юм. Таанад дээдэ гарай мэргэжэлтэд гээшэт. Ажалһаатнай олон юумэн дулдыдадаг. Бултандатнай хамаг һайханиие хүсэнэб, һонор ухаатай, сагаан сэдьхэлтэй ябахатнай болтогой. Саашадаашье үнэн сэхээр ажалаа ябуулжа, гэр бүлэдөө жаргалтай һуухыетнай хүсэнэб», - гэжэ Алексей Цыденов хэлэбэ.
Олондо мэдээсэл тараадаг хэрэгсэлнүүдэй дунда үнгэргэгдэһэн уласай мүрысөөндэ хэблэмэл сонинуудай сэтгүүлшэдэй дундаһаа «Буряад үнэн» Хэблэлэй байшанай сэтгүүлшэн Баясхалан Дабаин шагнагдаба. Эсэгэ ороноо хамгаалгын Агууехэ дайнай үедэ Советскэ Союзай Геройн нэрэ зэргэдэ зууршалагдаһаншье һаа, элдэб шалтагаанаар тэрэнээ абаагүй зониие элирүүлхэ талаар ажал «Бурятия» сониной сурбалжалагша Баясхалан Дабаин ябуулдаг юм.
Телевидени ба радиогой сурбалжалагшадай дундаһаа Буряадай гүрэнэй теле-радиокомпаниин мэдээсэлэй дамжуулгануудай албанай шеф-редактор, сурбалжалагша Илья Кошлюнов 1-дэхи шатын дипломоор шагнагдаа. «Мэдээсэлэй агентствын сайт дээрэ эрхим ажал” номинацида Буряадта мэдээсэлэй ТАСС агентствын сурбалжалагша Эльвира Балганова түрүү һуури эзэлбэ. Хори аймагай «Удинская новь» сониной сэтгүүлшэн Евгений Гуров аймагуудай олондо мэдээсэл тараадаг хэрэгсэлнүүдэй эрхим сэтгүүлшэн гэжэ тодороо.
«Эрхим гэрэл зурагшан» гэһэн тусхай номинацида «Буряад үнэн» Хэблэлэй байшанай гэрэл зураг буулгагша Анна Огородник нэгэдэхи һуури эзэлбэ. «Ариг Ус» телекомпаниин түлөөлэгшэ Александр Намжилон эрхим телеоператор болобо. Кабанск аймагай «Байкальские огни» сонин «Аймагай эрхим сонин» гэһэн тусхай номинацида эрхимлэбэ.
Байгша ондо олондо мэдээсэл тараадаг хэрэгсэлнүүдэй түлөөлэгшэдтэ тусхай шангууд барюулагдаа. Тиигэжэ «Бурятия» телерадиокомпаниин хүтэлэгшэ Баирма Раднаева арадуудай хоорондо тэсэбэритэй харилсаа бэхижүүлһэнэй түлөө шагнагдаа. Үндэһэн соёл болон түрэлхи хэлэнэй хүгжэлтын түлөө ажал ябуулдаг «Мүнгэн тобшо» сайтын автор Намжилма Бальжинимаевада шан барюулагдаа. Энэл шанда «Нютаг хэлэн/Диалекты» сонин хүртэһэн байна. Бага болон дунда олзын хэрэг эрхилэгшэдые дэмжэһэнэй түлөө «Номер Один» сониной сэтгүүлшэн Лев Хандажапов тусхай шанда хүртөө. Эрхэтэдэй эдэбхи үүсхэл дэмжэһэнэй, дэбжүүлһэнэй түлөө «Ариг Ус» телерадиокомпаниин сурбалжалагша, «Власть и мы» гэһэн дамжуулгануудые бэлдэһэн, «Восточный экспресс» дамжуулгын редактор Алексей Фишев шагнагдаа. Гэр байрын ажахын һалбариин ажал тухай хөөрэһэн, харуулһан «Ариг Ус» телерадиокомпаниин корреспондент Светлана Носковада шан барюулагдаһан байна. Эмшэлэлгын туһа хүргэлгэ тухай хөөрэһэнэй түлөө гүрэнэй «Бурятия» телерадиокомпаниин сурбалжалагша Анна Атанова шагнагдаа. «Ариг Ус» телерадиокомпаниин сурбалжалагша Сергей Соголовто эрэмдэг бэетэй хүнүүдэй шиидхэгдээгүй асуудалнуудые харуулһанайнь түлөө шан барюулагдаа.
«Ариг Ус» телерадиокомпаниин ахамад инженер Алексей Спиридоновто Ородой Холбоото Уласай Хэлхеэ холбооной болон олондо мэдээсэлгын яаманай Хүндэлэлэй грамота барюулагдаа. Олон жэлэй туршада олондо мэдээсэл тараадаг хэрэгсэлнүүдэй һалбарида аша үрэтэйгөөр хүдэлжэ байһан гүрэнэй «Бурятия» телерадиокомпаниин сурбалжалагша Светлана Жигжитова Буряад Уласай Хүндэлэлэй грамотаар шагнагдаа.
Буряад Уласай Толгойлогшо Алексей Цыденов Байгалай медиафорумдо бэлдэжэ үнгэргэһэнэй түлөө хизаарламал харюусалгатай «ИнформПолис» бүлгэмэй гүйсэдхэхы захирал Чингис Дагаев, энэл бүлгэмэй рекламын менеджер Елена Амоголонова болон Буряадай гүрэнэй ехэ һургуулиин мэдээсэлэй албанай дарга Иван Логиновто Баярай бэшэгүүдые барюулһан байна.
Тиихэдэ хэблэл мэдээсэлэй үдэртэ дашарамдуулан, Буряад Уласай Болбосоролой болон эрдэм ухаанай яаман, Соёлой яаман «Буряад үнэн» Хэблэлэй байшанай сурбалжалагшадай ажал үндэрөөр сэгнэжэ, Баярай бэшэгүүдые барюулһан байна. Болбосоролой болон эрдэм ухаанай яаманда болбосоролой һалбариин ажабайдал тухай олондо хөөрэһэн манай сурбалжалагшад Борис Балданов Баясхалан Дабаин хоёрые тэмдэглээ, мүнгэн шан барюулаа.
Буряад Улас дотор боложо байдаг соёлой хэмжээ ябуулганууд тухай буряадаар бэшэһэн Сэнгэ Ринчинов, Борис Балданов гэгшэд Буряад Уласай Соёлой яаманай Баярай бэшэгээр урмашуулагдаба.
Буряад Уласай Засагай газарай мэдээсэлэй албанһаа гэрэл зураг абтаба.
