​Шэнэ һургуулинууд бодхоогдоно

111–дэхи кварталда шэнэ һургуули баригдажа байна

Захаамин аймагай Сахирай һургуули һэльбэн шэнэлэгдэжэ, декабриин 27-до нээгдээ. Энэ баяр ёһололдо Буряад Уласай болбосоролой болон эрдэм ухаанай сайд Баир Жалсанов хабаадаа. “Эрдэм һуралсалай эмхинүүдтэ шэнэ һууринуудые байгуулха та­лаар гүрэнэй программын хэмжээндэ һэльбэн шэнэлэлгын энэ хэрэгтэ 42,9 сая мүнгэн һомологдоо. Долоо һарын туршада һургуулиин байшан заһабарилагдажа, мүнөө үеын эрилтэ­дэ таарама шэнэ түхэлэй болгогдобо.

Буряад Уласай Толгойлогшо Алексей Цыде­нов олон халаанай һуралсал усадхаха, һуралсалай эмхинүүдтэ таатай байдал зохёохо тухай асуудал Засагай газарта табяа бэлэй. Тиигэжэ 2017 ондо улас дотор 28 һургуули заһабарилагдаа, энэ хэ­рэгтэ гүрэнэй мүнгэн зөөриин жасаһаа 386,6 сая түхэриг һомологдоо.

Сахирай дунда һургуули үнгэрһэн зуун жэлэй 54 ондо баригдаһан түүхэтэй, мүнөө эндэ 100 һурагшад һурана.

Буряад орондошье болон Ород гүрэнэй захын бусад можонуудаар һургуулинуудта һурагшад багтангүй, хоёр-гурбан халаанаар ажалла­ха баатай. Манай Буряад Улас дотор нёдондо һуралсалай жэлдэ 5 һургуули гурбан халаанаар хүдэлөө. Гурбадахи халаанда 780 үхибүүн һураа. Мүнөө һуралсалай жэлдэ 1300 һурагша 7 һургуулида гурбадахи халаанда һуража байна. Энэ хадаа Улаан-Үдэ хотын, Ивалга, Тарбагатай аймагуудай һургуулинууд гээшэ. Энэ байдал усад­халгын хэмжээ ябуулгануудай түсэб Буряад Ула­сай Толгойлогшо Алексей Цыденовэй зууршалгаар ашаглагданхай.

Энэ талаар ямар ажал ябуулагдажа эхилэн­хэйб гэбэл, иимэ. Байгша оной февралиин 1-һээ Улаан-Үдэ хотын 63 дугаар һургуулиин нэмэлтэ 350 һууритай байшан ашаглагдажа эхилхэнь. 14 дүгээр гимназиин филиал һэльбэн шэнэлэгдэжэ, үшөө 250 һурагшадай һуури байгуулагдаба.

- Буряад Уласай Толгойлогшо эгээл түрүүн баригдаха ёһотой 8 һургуулинуудай газарнуудые тодорхойлһон. Тэдэнэй 5 һургуулидань гурбадахи халаан усадхагдаха, харин Сэлэнгэ, Хурамхаан, Кабанск аймагуудай 3 һургуулида һандаран хуушарһан байшангуудай орондо шэнэ һургуулинууд баригдаха юм, - гэжэ Буряад Уласай болбосоролой болон эрдэм ухаанай сайд Баир Жалсанов мэдээсэбэ.

Гаража ерэһэн 2018 ондо үшөө шэнэ һургуулинууд мүндэлэн бодохо юм ха. Ивалга ай­магай Гүрэльбэ һууринда 450 һууритай һургуули одоол баригдахань. Улаан-Үдын 111-дэхи квар­талда гоё һайхан һургуули бодожо байна. Энэ һургуули гурбан дабхар, һаруул, томо, холоһоо харахада, һүрөөтэй гоё боложол байна. Түрүүн хэлсэхэдээ, 1008 һууритай, үхибүүдэй тамар­даг бассейнтэй һургуули бодохо гэлсээ бэлэй. Һүүлшын мэдээгээр, эндэ 740 һууритай, хоёр та­мирай танхимтай, шэнэ эрилтэдэ таарама шэнэ үеын һургуули болохонь ха. Эндэ үхибүүдэй сэдь­хэлэй байдал тэнсүүлхэ, амаруулха, элдэб талаар хүгжөөхэ арга олгуулдаг шэнэ һургуули нээгдэ­хэнь. Түсэбөөрөө һургуули 2018 оной декабрь һара хүрэтэр баригдаха гэжэ баталагданхай, ха­рин дары түргэн хэгдэжэ байһан үйлэ хэрэгүүдые хаража байхада, һуралсалай шэнэ жэлһээ энэ һургуули һурагшадайнгаа урда үүдэеэ сэлихэл бэшэ аа гү гэжэ тухайлхаар.

Энэ жэлдэ үшөө ямар һургуулинууд үргэдхэгдэхэб гэхэдэ, Улаан-Үдын 25 дугаар дун­да һургуули, 33 дугаар гимнази олон һууритай болохоор хараалагдана. Бурвод шадар 1200 һууритай шэнэ һургуули бодохо юм. Посельедэ 450 һууритай һургуули, Тарбагатай аймагта Доо­до Саянта һууринда баһал иимэ түхэлэй һургуули баригдаха. Тиигэжэ дээрэ хэлэгдэһэн гурбан халаанаар һурадаг һургуулинууд үргэдхэгдэжэ, гур­бадахи халаангүй боложо, хоёрдохи халаан нэгэ бага хүнгэрхэ юм.

Цырегма САМПИЛОВА