717
Ородой Холбоото Уласай Юрэнхылэгшын нөөсын жасаһаа мүнгэн һомологдожо, Улаан-Үдэдэ оршодог хүүгэдэй клиническэ больницада эмнэлгын түхеэрэлгэнүүд абтаба.
Буряад Уласай хүүгэдэй клиническэ больницада үхибүүдтэ һайн шанартай эмнэлгын туһа хүргэхэ талаар мүнөө сагай эрилтэнүүдтэ таараһан эмнэлгын түхеэрэлгэнүүд хэрэгтэй болоһон байгаа. Тиимэһээ 2017 оной октябрь һарада хируургиин, реанимациин таһагуудта болон операци хэдэг танхимуудта эмнэлгын туһа хүргэхэ түхеэрэлгэнүүдээр хангалгада 35 сая 327 мянган түхэриг һомологдоһон байна.
Уласай хүүгэдэй клиническэ больницада мүнөө дээрээ эмшэлэлгын 38 түхеэрэлгэнүүд тодхогдонхой. Үхибүүдые аргалха, зүбөөр үбшыень элирүүлхэ талаар түхеэрэлгэнүүдэй ехэнхи хубинь Ород гүрэндэ бүтээгдэһэн юм. Тиигэбэшье энэ һалбарида аша үрэтэйгөөр ажалаа ябуулдаг хари гүрэнүүдэй мэдээжэ үйлэдбэрилэгшэдтэй суг хамта бүтээһэн хэрэгсэлнүүдшье бии. Тэдэнэй тоодо нарай нялха үхибүүдтэ аюулгүйгөөр эмнэлгын туһа хүргэхэ түхеэрлгэ абтаһан байха юм.
