771
Буряад Уласай Толгойлогшо Алексей Цыденовэй хүтэлбэри доро албан газарнуудай хоорондын олониитын комисси үсэгэлдэр үнгэргэгдэбэ. Буряад Уласай Засагай газарай гэшүүд, Буряад Уласай нютагай засагай байгууламжануудай зүблэл, Улаан-Үдын захиргаанай, «Ниитэ нэгэ Росси» намай Буряадтахи таһагай, «Арадай фронт Россиин түлөө» гэһэн олониитын хүдэлөөнэй түлөөлэгшэд энэ хэмжээ ябуулгада хабаадаба.
Ородой Холбоото Уласай Юрэнхылэгшын «Болбосон түхэлтэй хотын оршон байгуулха» гэһэн программа бэелүүлхэ талаар зүблөөн эмхидхэгдэһэн байна. Буряад уласай ажаһуугшад болбосон түхэлтэй болгохо газарнуудые шэлэхэ аргатай. Тиимэһээ байгша ондо тус программын хэмжээндэ энэ талаар ямар ажалнууд хаана хэгдэхэб гэжэ һунгахыень ажаһуугшадые Алексей Цыденов уряалба.
- Ородой Холбоото Уласай Юрэнхылэгшэ Владимир Путинай даабаряар Ород гүрэнэй Засагай газар 2017 онһоо хойшо «Болбосон түхэлтэй хотын оршон байгуулха» гэһэн программа бэелүүлхэ талаар ажал ябуулна. Үнгэрэгшэ жэлдэ Буряад Уласта энэ хэрэгтэ 216 сая түхэриг мүнгэн һомологдоһон юм. Тиигэжэ гэрнүүд шадархи 248 газарта, 4 парк болон олиниитын удха шанартай 27 газарнууд болбосон түхэлтэй болгогдоо, - гэжэ Буряад Уласай Толгойлогшо Алексей Цыденов хэлэбэ.
Уласай хүтэлбэрилэгшын хэлэһээр, ажаһуугшад хаана хотын оршон һайжаруулагдахаб гэжэ өөһэдөө шэлэхэ.
- Һанамжаараа хубаалдажа, хаана, ямар ажалнууд хэгдэхээр бэ гэжэ Ажаһуугшадые хабаадууулха хүсэлтэйбди. «Аюулгүй, һайн шанартай харгынууд» гэһэн түсэл бэелүүлхэдэ, ажаһуугшадай һунгаһан харгынууд түсэлдэ оруулагдаа. Мүнөө түсэл бэелүүлхэдээ, һунгалта Интернедэй хүсөөр бэшэ, харин ажаһуугшад ерэжэ дуугаа үгэхэ болоно, - гэжэ уласай хүтэлбэрилэгшэ тэмдэглэбэ.
Байгша ондо «Болбосон түхэлтэй хотын оршон байгуулха» гэһэн программаар Буряад Уласта 220 сая түхэриг һомологдоо. Тэрэнэй 206, 5 сая түхэриг - федеральна һанһаа, 13,1 сая түхэриг уласай һанһаа гаргашалагдаха юм. Энэ программада 14 һууринууд хабаадаха. Нэрлэбэл, Улаан-Үдэ, Северобайкальск, Загарай аймагай Загарай, Онохой, Захаамин аймагай Закаменск, Кабанск аймагай Селенгинск, Бабушкин, Выдрино, Кабанск, Каменск, Хяагтай аймагай Хяагта, Мухар-Шэбэр аймагай Сагаан-Нур, Байгал шадарай аймагай Туруунтаево, Сэлэнгэ аймагай Гусиноозёрск гэһэн хотонууд болон һууринууд бүридэлдэ оруулагданхай.
Январиин 9-һөө февралиин 9 болотор нютагай өөһэдын хүтэлбэринүүдтэ хотын, һууринай оршон болбосон түхэлтэй болгохо талаар ажаһуугшад дурадхал оруулха. Февралиин 16 болотор эдэ газарнууд элирүүлэгдэжэ, нютагай засагай байгууламжын, гэр байрын ажахын сайт болон «Бурятия» сониндо хэблэгдэхэ. Удаань нютагай засагай байгууламжанууд дизайн-түсэлнүүдые бэлдэжэ, сайтнуудтаа толилхо болоно. Тиихэдэ мартын 15 болотор тэдэ түсэлнүүд олониитэдэ хэлсэгдэхэ юм. Тэрэнэй һүүлээр мартын 18-да бүридэлдэ ороһон аймагуудай ажаһуугшад болбосон түхэлтэй болгогдохо газарнуудые шэлэжэ һунгаха. 14 наһатайһаа дээшэ хүнүүд паспортаяа абажа, дуугаа үгэхэ аргатай.
