713
Байгша оной январиин 29-һөө февралиин 2 болотор Улаан-Үдэдэ «Залуу мэргэжэлтэд» (WorldSkills Russia) гэһэн уласай IV чемпионат үнгэргэгдэхэ.
16-тайһаа 22 болотор наһатай оюутад болон залуу мэргэжэлтэд уласай хэмжээ ябуулгада хабаадаха аргатай юм. Тиихэдэ тэдэнэр, гагналга, зайн гал хабсаралга, аяншалга, автомобильнуудые заһабарилга, хүүгэдэй сэсэрлигүүдэй болбосорол, эхин класуудта заалга, үһэ тайралга, тамир болон спорт, һургуулинуудта хүгжэм заалга, эмнэлгын болон ниигэмэй туһа хүргэлгэ, олзын хэрэг эрхилэлгэ гэһэн болон бусад шэглэлнүүдээр мүрысэхэ. 16 наһа хүрөөгүй эдиршүүл дүрбэн шэглэлдэ хаба шадалаа туршаха.
- 14-22 наһатай залуушуулые элдэб мэргэжэлнүүдтэ хараадуулан һургаха, уласай мэргэжэнги болбосоролдо уласхоорондын болон үндэһэтэнэй эрхим жэшээнүүдые нэбтэрүүлхэ, дээдэ хэмжээнэй чемионадта хабаадаха суглуулагдамал команда бүридхэхэ, «Залуу мэргэжэлтэд» хүдэлөөнэй гол зорилго бэелүүлхэ зорилготой чеемпионат үнгэргэгдэнэ, - гэжэ Буряад Уласай Болбосоролой болон эрдэм ухаанай сайдай нэгэдэхи орлогшо Галина Фомицкая хэлэбэ.
Уласай чемпионадта 177 залуушуул хабаадаха. Эдэнэр хадаа уласай мэргэжэлэй болбосоролой эмхинүүдтэ шэлэн абалгын шата гараһан байха юм. Тиихэдэ Эрхүү можын, Хабаровск, Красноярск хизаарнуудай түлөөлэгшэд хаба шадалаа туршаха. Буряад Уласай, Хабаровск, Новосибирск, Кемерово, Тольятти, Казань, Москва, Санкт-Петербург хотонуудай мэргэджэлтэ шүүбэришэд хабаадагшадй ажалнуудые сэгнэхэ.
Чемпионадай гол талмай хадаа худалдаа наймаанай-сэнгүүлгын «Capital mall» түб болоно. Эндэ хабаадагшад 11 шэглэлээр мүрысэхэ, мүнөө үеын оньһон технологиин үзэсхэлэн дэлгэгдэхэ. Бэшэ шэглэлнүүдээр мүрысөөн Улаан-Үдын мэргэжэлэй болбосоролой 7 эмхинүүдтэ үнгэргэгдэхэ.
Буряад Уласай Болбосоролой болон эрдэм ухаанай яаман болон Буряадтахи «Залуу мэргэжэлтэд (Ворлдскиллс Россия)» гэһэн залан хүтэлбэрилгын түб мүрысөө эмхидхэнэ.
«Залуу мэргэжэлтэд (Ворлдскиллс Россия)» гэһэн залан хүтэлбэрилгын түбтэй холбоо бариха утаһан болон хаяг: 8(3012)440537, e-mail: wsr_rb@mail.ru, сайт: http://wsr03.ru/.
Буряад Уласай Болбосоролой болон эрдэм ухаанай мэдээсэлэй албанһаа гэрэл зураг абтаба
