895
2018 оной январиин 10-най Буряад Уласай Засагай газарай 7-р дугаар захирамжаар галзуурһан үнэгэ агнабал, тэрэнэй түлөө мүнгэн түлэгдэхэ гэһэн шиидхэбэри абтаба.
Буряад Уласай Мухар-Шэбэр, Тарбагатай, Зэдэ, Загарай, Захаамин болон Бэшүүр аймагуудта галзуурһан үбшэндэ нэрбэгдэһэн үнэгэд элирүүлэгдэнхэй. Тиихэдэ Хяагта, Бэшүүр, Загарай, Сэлэнгэ,Ивалга аймагууд болон Улаан-Үдэ хотодо энэ үбшэн дэлгэржэ байнхай.
Буряад Уласай Толгойлогшо Алексей Цыденов хараалагдаагүй гаргашануудай нөөсын жасаһаа үнэгэ агнагшадта мүнгэ түлэжэ урмашуулха талаар 2,5 сая түхэриг һомолхо тухай захирамжа абаба. Тэрэ дансын ёһоор, нэгэ үнэгэнэй түлөө таба мянган түхэриг түлэгдэхэ. Тиихэдэ ангуушад агнуури хэхэ дансатай байха ёһотой. Үнэгэ бариһан тухай мэдүүлгэ бэшэжэ, тэрэнэй хаядаһа ашаглаһан тухай гүрэнэй ветеринарна албанай акт харуулжа, ангуушад урмашуулгада хүртэхэ гэжэ Буряад Уласай ветеринариин хүтэлбэриин мэдээсэлэй албан дуулгана.
