846
Буряадай гүрэнэй ехэ һургуулиин дэргэдэ январиин 25-26-най үдэрнүүдтэ Бүхэроссиин олимпиадын уласай шатада һурагшад хэр зэргэ хими мэдэхэ байһанаа шалгаба.
Буряад уласай Хурамхаан, Зэдэ, Ивалга, Хяагта, Хэжэнгэ, Загарай аймагуудай болон Улаан-Үдэ хотын һургуулинуудай 30 һурагшад эрдэм мэдэсэеэ шалгаба.
Олимпиада хоёр шатаһаа бүридэһэн байна. Тиихэдэ химиин хэдэн һалбаринуудаар даабаринууд үгтэбэ. Түрүүшын, шата январиин 25-да үнгэрөө. Хэр зэргэ хими мэдэхэ байһанаа, һурагшад гэршэлбэ. Энэ шатада үгтэһэн 6 даабариин табыень зүбөөр, дүүрэн харюутайгаар дүүргэбэл, эрхим гэжэ тоологдоо.
- Хоёрдохи шатада һурагшад лабораторидо хүдэлхэ дүй дүршэлөө харуулба. Тэдэнэр химическэ бодосуудай ондоо боложо хубилха уравнени бэшэхэ, удаань тэрэниие бэлдэхэ, элирүүлхэ шадабари, эрдэм мэдэсэеэ шалгаа, - гэжэ жюриин түрүүлэгшэ, Буряадай гүрэнэй ехэ һургуулиин химическэ факультедэй декан, химиин эрдэмүүдэй кандидат, доцент Галина Баторова хэлэбэ.
Галина Баторовай хэлэһээр, олимпиадын даабаринууд гүрэнэй ниитэ нэгэ шалгалтын асуудалнуудһаа орёо. Тиимэһээ хабаадагшадай ехэнхинь саашадаа энэ шэглэлээр дээдэ һургуулинуудта орожо, эмшэдэй гү, али химиин һалбариин мэргэжэлээр һураха хүсэлтэй.
- Олимпиадада хабаадагшад эмшэлэлгын институдта ородог, манайшье һалбариин оюутадай дунда олимпиадада илагшад һурадаг, - гэжэ Галина Баторова хэлэбэ.
Химиин олимпиадын түгэсхэлэй шата январиин 27-до үнгэргэгдэхэ. Энэ шатада даабаринуудые шүүн үзэхэ, хабаадагшад дүүргэһэн ажалнуудаа хараха, удаань дүнгүүд согсологдожо, илагшадые амаршалгын ёһолол үнгэргэгдэхэ.
Удаадахи олимпиада информатикаар үнгэргэгдэхэ юм.
