794
Улаан-Үдэ хотын 63 дугаар һургуулида залгалаа байшан баригдажа, һурагшад хоёр халаанда һураха аргатай болобо.
«2016-2015 онуудта Болбосоролой эмхинүүдтэ һуралсалай һууринуудые байгуулга» гэһэн федеральна программын хэмжээндэ тус һургуулида үшөө 350 һурагшадай һураха байшанай залгалаа баригдаба.
Һургуулиин шэнэ байшанда зайн галаар, дулаагаар, уһаар хангалгын системэ, канализаци хэгдэжэ, байшан дулаасуулагдажа, һургуулиин газаа болбосон түхэлтэй болгогдоһон байна. Тиихэдэ һургуулида компьютерна болон мультимедийнэ хэрэгсэлнүүд тодхогдожо, актова танхим, хими, биологи, ОБЖ, пресс-түбэй классуудта 40,1 сая түхэригэй һуралсалда хэрэгтэй тоног түхеэрэлгэнүүд абтаа. Хоёр байшан холбоһон дулаан байшантай залгалаа таба һарын туршада баригдаһан байна. Энэ барилгада уласай бюджедһээ 145,1 сая түхэриг гаргашалагдаа, удаань энэ гаргаша федеральна бюджедһээ түлэгдэбэ. Үлэһэн мүнгэн уласай болбосоролой 28 эмхинүүдэй заһабарилгада дамжуулагдаа.
Буряад Уласай Засагай газарай ниигэмэй хүгжэлтын талаар орлогшо Правительство Вячеслав Цыбикжаповай хэлэһээр, уласай һургуулинуудта гурбан халаанда һурахаяа болихо талаар Засагай газарта ажал ябуулагдана. Мүнөө Улаан-Үдын 4 һургуулинуудта, Ивалга болон Тарбагатай аймагуудай нэгэ-нэгэ һургуулинуудта һурагшад гурбан халаанда һурана.
«Федерациин Зүблэлдэ Буряад уласай үдэрнүүдэй үедэ энэ асуудалаар хэлэгдэһэн байна. Ородой Холбоото Уласай Болбосоролой яамантай суг хамта асуудал шиидхэхэ талаар ажал ябуулагдана. 2019-2020 онуудта гурбадахи халаан усадхаха тухай Алексей Самбуевич зорилго табиһан байна. Гүрэнэй-хубиин талаһаа суг ажал ябуулжа, һургуули бариха арга бии. Мүнөө дээрээ мүнгэ һомологшодтой хэлсэжэ байнабди. Һаяын үдэрнүүдтэ конкурс соносхогдохо», - гэжэ Вячеслав Цыбикжапов хэлэбэ.
«63 дугаар һургуули шэнэлэгдэбэ, үргэдхэгдэбэ. Энэ һургуули шэнэшье һаа, үргэдхэхэ хэрэгтэй болоһон байна. Гүрэн түрэмнай үхибүүдтэ анхаржа байдаг», - гэжэ Буряад Уластахи ахамад федеральна инспектор Сергей Ромахин тэмдэглэбэ.
63 дугаар һургуули 1998 ондо хүүгэдэй сэсэрлигэй байшанда 550 һурагшадай һураха түсэлөөр баригдаһан юм. Мүнөө энэ һургуулида 1534 һурагшад һурана.
Буряад Уласай Засагай газарай хэблэлэй албанһаа гэрэл зураг абтаба.
