891
«Түрэлхидэй гүрэнэй ниитэ нэгэ шалгалта тушааха үдэр» гэһэн Бүхэроссиин хэмжээ ябуулга Буряад Уласай Ивалга аймагай юрэнхы болбосоролой һургуулида мүнөөдэр хоёрдохи жэлээ эмхидхэгдэбэ.
Байгша оной хэмжээ ябуулгада Буряад Уласай болбосоролой болон эрдэм ухаанай сайд Баир Жалсанов, яаманай мэргэжэлтэд, сурбалжалагшад болон хорёод түрэлхид сугларһан байна. Гүрэнэй ниитэ нэгэ шалгалта тушаахадаа, һурагшадай дүүргэдэг даабаринууд, ямар оршондо хэмжээ ябуулга үнгэргэгдэнэб гэжэ эндэ сугларагшад бэе дээрээ ойлгобо. Тиихэдэ түрэлхид ород хэлээр эрдэм мэдэсэеэ шалгаһан байна. Хэрбээ һурагшад шалгалтын үедэ 40 даабари дүүргэжэ, найруулга бэшэдэг һаань, түрэлхид долоон даабари дүүргэжэ, найруулга бэшэбэ.
- Гүрэнэй ниитэ нэгэ шалгалтада бэлэдхэл эхилһэн шабинар, тэдэнэй түрэлхид болон багшанарта түгшүүрилтэй байдалай тохёолдохогүйнь тула хэмжээ ябуулга үнгэргэгдэнэ. Гүрэнэй ниитэ нэгэ шалгалта тушаажа эхилһэн сагһаа 12 жэл үнгэрөөшье һаань, олон түрэлхид, һурагшад һанаагаа зобоно, - гэжэ Баир Жалсанов тэмдэглэбэ.
2018 оной гүрэнэй ниитэ нэгэ шалгалтада ехэ хубилалтанууд оруулагдаа үгы. Мэдээсэлэй талаһаа аюулгүй байдал сахиха хэмжээнүүд тэрэл хэбээрээ, тиихэдэ шалгалта үнгэргэгдэхэ газарнуудта гүрэнэй ниитэ нэгэ шалгалтын даабаринууд хэблэгдэхэ юм.
Буряад Уласай Болбосоролой болон эрдэм ухаанай сайдай тэмдэглэһээр, энэ хэмжээ ябуулгын ашаар һургуулинуудай, багшанарай гүрэнэй ниитэ нэгэ шалгалтада бэлэдхэл шалгагдана, хаана, ямар дутуу дундануудые усадхаха хэрэгтэйб гэжэ элирүүлэгдэнэ.
Тиигэбэшье түрэлхид шалгалта тушааһанай удаа хэр зэргэ бэшэбэ гээшэбди гэжэ һанаата болоһониинь эли байба.
- Бидэ үхибүүдһээнь үлүүгээр һанаата болонобди. Һайн бэлэдхэлтэй һаа, һайн сэгнэлтэдэ шалгалта тушаахаар. Түрэлхидтэ иимэ хэмжээ ябуулга үнгэргэгдэһэндэнь һайшаалтай. Юундэб гэхэдэ, бидэ өөрынгөө нюдөөр ямар оршондо гүрэнэй ниитэ нэгэ шалгалта үхибүүднай тушаанаб гэжэ харабабди. Бидэ нэгэ часай туршада шалгалта тушаагаа һаа, һурагшад дүрбэн часай туршада даабари дүүргэхэ ха юм. Тиихэдэ даабари дүүрэн дүргэжэ үрдихэ, - гэжэ шалгалта тушааха һурагшын эжы Туяна Догдонова хэлэбэ.
Шалгалта тушааһанай удаа Баир Жалсанов һанамжаараа хубаалдаба:
- Заабаринуудые баримталха шухала, бүхы даабаринууд ойлгосотой. Орёо даабаринууд гэжэ хэлэхэ аргагүйб, тиигэбэшье зарим ушарта маргаад абааб. Шалгалта намда һайшаагдаа, зохёохы даабаринууд үгтэһэн байна. Үхибүүдтэ шалгалта тушаахадаа, һанаата болонгүй, һуралсалай үедэ һайн бэлэдхэл хэхэ зүбшэл үгэхэ байнаб.
2018 ондо гүрэнэй ниитэ нэгэ шалгалта сагһаа урид тушааха болзор мартын 21-һэээ апрелиин 11 болотор, харин майн 28-һаа июлиин 2 болотор шалгалтын шухала болзор юм гэжэ һануулнабди.
Буряад Уласай болбосоролой болон эрдэм ухаанай хэблэлэй албанай гэрэл зураг
