1190
Буряад хэлэндэ һургаха ниитэ нэгэ болбосоролой оршон байгуулха тухай Буряад Уласай, Эрхүү можын болон Үбэр Байгаалай хизаарай түлөөлэгшэд февралиин 22-то хэлсээ баталба.
Буряад Уласай Толгойлогшо Алексей Цыденовэй тэмдэглэһээр, энэ хэлсээнэй ашаар буряад хэлэ сахин хүгжөөхэ талаар гурбан можодо хэгдэжэ байһан ажал бүри эршэдэхэ.
«Буряад хэлэ сахин хүгжөөхэ талаар хэгдэжэ байһан ажал эршэдэхэ гэжэ этигэнэб. Буряад хэлэндэ һургалга залан хүтэлбэрилхэ зорилготой гурбан можонууд нэгэдэбэ», - гэжэ Алексей Цыденов тэмдэглэбэ.
Байгша оной ноябрь һарада буряад хэлэ заадаг багшанарай дунда уласхоорондын хоёрдохи мүрысөөн эмхидхэгдэхэ гэжэ уласай хүтэлбэрилэгшэ хэлэбэ. 2017 ондо үнгэргэгдэһэн мүрысөөндэ Буряад Уласай, Эрхүү можын, Үбэр Байгалай хизаарай, Монгол болон Үбэр Монголой багшанар хабаадаһан байна.
Буряад Уласай болбосоролой болон эрдэм ухаанай сайд Баир Жалсанов, Эрхүү можын болбосоролой сайд Валентина Перегудова болон Үбэр Байгалай хизаарай болбосоролой, эрдэм ухаанай болон залуушуулай бодолгын сайд Андрей Томских гэгшэд буряад хэлэндэ һургаха ниитэ нэгэ болбосоролой оршон байгуулха тухай хэлсээ баталһан байна.
«Ургажа ябаа улаан бургааһадай ерээдүйн түлөө ухаан бодол, арга боломжонуудаа нэгэдүүлхэ саг ерээд байна. Буряад хэлэ сахин хүгжөөхэ талаар хэгдэхэ ехэ ажалай эхин табигдаба», - гэжэ Баир Жалсанов хэлэбэ.
«Буряад хэлэ сахин хүгжөөлгэ» гэһэн уласай программаар 30 саяһаа дээшэ түхэриг байгша ондо һомологдохо. Буряад Уласай 354 һургуулинуудай 51 хуби һурагшад буряад хэлэ шудална.
Тус хэмжээ ябуулгын үедэ Болбосоролой үндэһэн эмхинүүдэй эблэлэй түлөөлэгшэд тусхай талммайнуудые бэлдэжэ, буряад арадай наадан, дуун, хатар, ёһо заншал харуулжа, буряад арадай эдеэ хоолой болон уран бүтээлэй үзэсхэлэн дэлгэһэн байна.
Анна Огороднигой гэрэл зурагууд
