887
Байгша оной февралиин 22-то һурагшадай бүхэроссиин олимпиадын уласай шата Буряадта түгэсэбэ. Олимпиадын һүүлшын үдэр һурагшад хитад хэлэнэй олимпиадада хаба шадалаа туршаһан байна.
Буряад Уласта һурагшадай бүхэроссиин олимпиада январиин 11-һээ февралиин 22 болотор үнгэргэгдэһэн байна. Энэ хэмжээ ябуулгада уласай 1233 һурагшад хабаадаа. 2017 оной олимпиадын уласай шатада 1172 шабинар хабаадаһан байна.
Һурагшадай бүхэроссиин олимпиадын уласай шатын хэмжээндэ анха түрүүшынхиеэ 7-8-дахи классуудай һурагшадай дунда тоо бодолгоор болон физикээр Д.Максвеллай нэрэмжэтэ олимпиада үнгэргэгдэһэн байна. Эндэ 60 һурагшад эрдэм мэдэсэеэ шалгаһан байна. 7-8-дахи классудай һурагшадай дүүргэһэн даабаринуудай дүнгүүд болбосоролой «Сириус» түбтэ эльгээгдээ. Удаань тус түбэй тоо бодолго болон физикын болбосоролой халаанда эрхим хүдэлмэри бэшэһэн һурагшад шэлэн абагдаха.
Бүхэроссиин олимпиадын уласай шатада 9-дэхи классуудай һурагшадай дунда тоо бодолгоор түрүү һуури эзэлһэн Улаан-Үдын 56 дугаар һургуулиин шаби Жамса Хайдапов Сочи хотын болбосоролой «Сириус» түбтэ 2018 оной март һарада һураха юм.
Буряад Уласай Засагай газарта мартын 15-да һурагшадай бүхэроссиин олимпиадада илагшадые шагналгын баяр ёһолол үнгэргэгдэхэ. 2018 оной март һарада Ородой Холбоото Уласай Болбосоролой болон эрдэм ухаанай яаманда уласай шатын олимпиадын дүнгүүдээр түгэсхэлэй шатада хабаадаха ахамад классуудай һурагшад тобьёг байгуулагдаха. Олимпиадын түгэсхэлэй шата март-апрель һарануудта үнгэргэгдэхэ юм.
