699
Буряад Уласай Толгойлогшо Алексей Цыденов албанай хэрэгээр Ивалга аймагаар ябахадаа, Хойто-Бэе нютагта соёлой-тамирай түб нээлгын баяр ёһололдо хабаадаа.
Соёлой-тамирай түбэй барилга арад зоной оролдогоор эхилһэн байна. Удаань уласай «Олониитын хангалгын байгууламжа хүгжөөлгэ» гэһэн уласай программаар мүнгэн һомологдожо, барилга дүүрэн хэгдэбэ. Соёлой-тамирай түб бариха үүсхэл «Нижнеиволгинское» һомоной «Сагаан Дали», «Западный», «Тамир», «Нютаг» гэһэн ТОСууд гаргаһан байна. Тэдэнэр барилга эхилхэ марафон эмхидхэжэ, эбээн тэдхэгшэдтэй хамта 2,9 сая түхэриг суглуулаа. Удаань аймагай болон уласай мүнгэн һанһаа 7,4 сая түхэриг һомологдоо юм.
Соёлой-тамирай түб 432 дүрбэлжэн метр талмайтай. Шэнэ байшан дотор номой сан, кружогуудые эмхидхэхэ кабинедүүд, тамирай болон харагшадай танхимууд бии. Тиихэдэ эндэ сүлөөтэ барилдаанай, волейболой, гиир үргэлгөөр, боксын, теннисэй, һур харбалгын секцинүүд ажалаа ябуулха.
Соёлой-тамирай түб нээлгын баяр ёһололдо Буряад Уласай хүтэлбэрилэгшын тэмдэглэһээр, олониитын эдэбхи үүсхэл ехэ удха шанартай юм.
«Нёдондо эндэ гансал байшанай торхо бодонхой, барилга хэхэ модон байгаа һэн. Танай оролдолгоор, эдэбхи үүсхэлээр барилга хэгдэжэ эхилээ, удаань уласай болон аймагай талаһаа туһаламжа үзүүлэгдэһэн байна. Хамтын хүсөөр шэнэ байшан бодхоогдоо. Ажаһуугшадай эдэбхи үүсхэлһээ ехэ хэрэг бүтэбэ», - гэжэ уласай хүтэлбэрилэгшэ ажаһуугшадта болон ТОСуудай эдэбхитэдтэ хандаба.
2018 ондо уласай бюджедтэ ТОСуудые дэмжэлгэдэ 60 сая түхэриг һомолхо гэжэ түсэблэгдэнхэй. 2017 ондо энэ хэрэгтэй 45 сая түхэриг гаргашалагдаа.
Буряад Уласай Засагай газарай хэблэлэй албанай гэрэл зураг
