632
Захаамин аймагай Ёнгорбой нютагта зуун һууритай шэнэ һургуули нээгдэбэ.
«Ородой Холбоото Уласай можо нютагуудта 2016-2025 онуудта болбосоролой эмхинүүдтэ һуралсалай һууринуудые байгуулхада дэмжэлгэ» гэһэн федеральна программаар болон «Болбосорол болон эрдэм ухаа хүгжөөлгэ» гэһэн гүрэнэй программаар уласай бюджетһээ мүнгэн һомологдоһон байна. Һургуули барилгада 151,4 сая түхэриг мүнгэн гаргашалагдажа, жэлэй туршада ажал ябуулагдаһан байна.
Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжапов һургуули нээлгын баяр ёһололдо Ёнгорбойн һургуулиин һурагшадые, багшанарые болон түрэлхидые амаршалба. Вячеслав Цыбикжаповай хэлэһэнэй ёһоор, уласай программын хэмжээндэ Алексей Цыденовэй даабаряар һаяын жэлнүүдтэ улас дотор гурбадахи халаан усадхаха, газаа гараха дулаан газарнуудаар, эдеэ хоол бэлдэхэ газар болон тамирай танхимуудаар хангаха тухай түсэблэгдэнхэй.
Шэнэ һургуули оньһон комплекс, компьютерэй болон тамирай тоног хэрэгсэлнүүдээр хангагданхай. Тиихэдэ болбосоролой гуламтада эрэмдэг бэетэй хүнүүдтэ үргэдэг платформо, тамирай болон актова танхимууд бии. Һургуулиин дэбисхэртэ тамирай талмай баригдажа, тусхай хушалтатай гүйхэ харгы баригдаа.
«Захаамин аймагай Ёнгорбой нютагта хоёр дабхар һургуули жэлэй туршада баригдаба. Энээнһээ урид һурагшад дайнай урда жэлнүүдтэ баригдаһан хуушан байшангуудта һурадаг байгаа. Мүнөө тэдэнэр дулаан, һаруул байшанда һураха аргатай», - гэжэ Буряад Уласай барилгын болон гэр байрын ажахы шэнэдхэлгын сайдай орлогшо Николай Рыбальченко хэлэбэ.
Буряад Уласай Болбосоролой болон эрдэм ухаанай сайд Баир Жалсановай хэлэһээр, Ёнгорбойн һургуули Ородой Холбоото Уласай аюулгүй байдал сахиха, болбосоролой стандартын хуулиин талаар эрилтэнүүдтэ таарана.
1928 ондо Ёнгорбой нютагта һургуули баригдаһан юм. 2017 ондо Буряад Уласай Засагай газарта шэнэ һургуули бариха тухай шиидхэбэри абтаһан байха юм. Барилга хэгдэхэ үедэ һурагшад эхин классуудай байшанда һуралсалаа үргэлжэлүүлжэ байгаа. Мүнөө энэ һургуулида 90 шабинар һурадаг юм.
Буряад Уласай Засагай газарай хэблэлэй албанай гэрэл зураг
