​БУУРАЛ ЗОХЁОЛШЫН УРАН ҮГЭ ДУУЛААД

Февралиин 22-то Улаан-Үдэ хотодо Үндэһэтэнэй номой санда “Сагаалганай уулзалганууд” гэһэн үдэшэ үнгэрөө. Эндэ Буряадай арадай уран зохёолшо, Буряад Уласай соёлой габьяата хүдэлмэрилэгшэ, СССР-эй, Ородой Холбоото Уласай Уран зохёолшодой холбооной гэшүүн Доржи Осорович Эрдынеевтэй уулзалга эмхидхэгдээ. Тус уулзалгые энэл холбооной гэшүүн, Ородой Холбоото Уласай габьяата зүжэгшэн Доржо Сультимов хүтэлбэрилөө.

Доржи Осорович Агын тойрогой Агын аймагай Сахюурта нютагай Удаганта гэжэ газарта 1936 ондо түрэһэн намтартай. Тэрэ 1966 ондо Москва хотодо Максим Горькиин нэрэмжэтэ уран зохёолшодой дээдэ һургуули дүүргэһэн юм.

83-дахи Сагаалганаа угтажа байһан уран зохёолшоноймнай хурса гуурһан дороһоо олон но­мууд нара хараһан юм. “Газарай амисхаал”, “Хүлэг инсагаална”, “Энэ наһан”, “Внуки Тубэргэна”, “Время покоса”,”Ехэ уг”, “Талын туужа” гэһэн зохёолнуудынь хүн зондо мэдээ­жэ. Олон бүтээлнүүдынь “Байгал“ сэтгүүлдэ , “Правда Бурятии”, “Бу­ряад үнэн” сонинуудта хэблэгдэһэн юм. Хэдэн номуудынь эстон, монгол, узбек, яхад, болгар, тува хэлэнүүд дээрэ оршуулагдаһан.

“Ранние заморозки”, “Человек идет к цели”, “Бальжин хатан” гэһэн туужануудынь зүжэг болгогдожо найруулагдаһан. Тэдэнь Агын ба Хэ­жэнгын тайзанууд дээрэ оло да­хин табигдаһан байха юм. 1974 ондо “Эртын хюруу” (“Ранние замо­розки”), 1985 ондо “Бальжин хатан” гэһэн туужануудынь Буряад теа­траймнай тайзан дээрэ табигдаа. Эндэ Доржо Сультимов, Нина Токуренова, Михаил Елбонов гэгшэд уран гоёор наадажа, ялас гэмэ бэли­гээ харуулжа шадаһан бэлэй.

Энэ уулзалгада Буряадай арадай габьяата артист Нина Токуренова, ирагуу найрагша Цыбегмит Дамдин­жапова, номой сангай мэргэжэлтэн Жигзыма Цыренова, “Буряад үнэн” Хэблэлэй байшанай захирал Баяр Балданов хабаадаа. Тиихэдэ Агаһаа, түрэл тоонто Сахюурта нютагһаань, айлшаар бууһан сомоной дарга Ба­тор Яманов, Ветерануудай зүблэлэй түрүүлэгшэ Баир Лхамаев, нютагай эблэлэй түрүүлэгшэ Батор Жалса­нов, буряад хэлэ ба уран зохёолой багша Билигма Болотова гэгшэд һанамжатаяа хубаалдажа, Сагаалга­наар бултаниие амаршалан, Доржо Осорович ба наһанайнь нүхэр Анна Даржаевна хоёрто бэлэгүүдые барю­улаа.

“Амар сайн” ансамбль, Буряа­дай гүрэнэй оперо болон баледэй артистнар Валентина Цыдыпова, Александр Хандажапов болон бусад дуушад энэ үдэшые шэмэглээ.

Эсэстэнь Доржо Осоровичто үгэ үгтэжэ, тэрэ иигэжэ хэлэбэ: “Хүгшэн эжы Цыдыбэй Норжимо­до, абга Базарон Дондогто, эсэгын­гээ дүү Осорой Долгорто, хүлөө шоройдоһон тоонто нютагтаа, намайе үргэһэн Буряад орондоо энэ хэжэ ябаһан ажалдамни туһа хүргэжэ, дээшэнь үргэһэндэнь баярые хүргэнэб. Тэрэ сагай һургаал заабари тиимэ байһан. Минии эхэ эсэгын хэһэн буян даа”. 

Үндэһэтэнэй номой сангай хэблэлэй албанай гэрэл зураг