​Һайхан хэрэгүүдые үйлэдэжэ байг

Шэрээтэ Баир лама Цымпилов түрүүтэй Шэтын «Дамба Брайбунлинг» дасанай ламанар Шэтын гарнизоной Каштак гэһэн сэрэгэй хотодо Сагаалганай хурал хураба. Эндэ Буряад, Тыва уласуудһаа, Үбэр Байгалай хизаарһаа, Эрхүү можоһоо сэрэгэй албанда татагдаһан буддын шажантай сэрэгшэд хабаадаа.

Хуралай эхилхэһээ урид Баир лама бултаниие Сагаан һарын һайндэрөөр, Эсэгэ ороноо хамгаа­лагшын үдэрөөр, Ажалшан-таря­ашадай Улаан Армиин ба Флодой байгуулагдаһаар 100 жэлэй ойгоор амаршалаад, элүүр энхые, уялгата албандань амжалта хүсөө.

Удаань буддын шажан, Сагаан һарын һайндэр тухай, мүн гүрэнэймнай буддын шажантай бу­сад можо нютагуудта яажа тэмдэглэгдэдэг тухайнь хөөрэжэ үгөө.

Гадна Баир лама сэрэгшэ­дэй асуудалнуудта харюусаад, хүн бүхэнииень һайн хэрэгүүдые үйлэдэжэ ябахынь, һуралсал ба сэрэгэйнгээ алба амжалтатай бэелүүлхынь тула адислаа.

Шэтэ хото тоонтотой взводой командирай орлогшо, хэлсээтэ алба хаажа байһан сержант Батор Бадмаевай тэмдэглэһээр, тус ун­шалга сэдьхэлыень тэгшэлээ, са­гаан һанал бодол түрүүлээ, Эсэ­гэ орондоо алба хэхэ гэһэн бүхы наһанайнгаа хэрэг зүб шэлээб гэһэн бодолыень бэхижүүлээ. Суг алба хэдэг нүхэдынь баһал иимэ һанамжатай.

Авторай гэрэл зурагууд