920
Краса Бурятии-2017” мүрысөөндэ түрүүлһэн Улаан-Үдын Александра Цыренова “Краса России-2018” гэһэн мүрысөөндэ илалта туйлаба.
Сочи хотодо Хара далайн эрьедэ үнгэргэгдэһэн бүхэроссиин мүрысөөнэй түгэсхэлэй шатада Ородой Холбоото Уласай можо нютагуудай 42 басагад хабаадаһан байна. Анха түрүүшынхиеэ энэ мүрысөөндэ Улаан-Үдын басаган илаба гэжэ тэмдэглэлтэй. Александра басаган эдэй засагай һалбариин мэргэжэлтэй, мүнөө тэрэ М.В. Ломоносовой нэрэмжэтэ Москвагай гүрэнэй ехэ һургуулиин магистратурын 1-дэхи курсда һурана. Дангина басаган бага наһанһаа хойшо хатар, һур харбалгада ябаһан. Александра Цыренова эрэмдэг бэетэй үхибүүдэй оршон байдалда дадалгын «Ая-Ганга» түбэй түлөөлэгшэ юм. Тиихэдэ залуу басаган Сибириин эко эдеэ хоол худалдаха олзын хэрэг эрхилдэг. Бүхэроссиин мүрысөөндэ илаһан Александра «Мисс Земля» мүрысөөндэ хабаадаха юм.
Бүхэроссиин мүрысөөнэй хоёрдохи һуури «Мисс Улан-Удэ - 2017» нэрэ зэргэдэ хүртэһэн Наталья Телешева эзэлбэ. 18 наһатай басаган Зүүн Сибириин технологи болон хүтэлбэриин гүрэнэй ехэ һургуулиин оюутан юм. Тэрэ хүнгэн атлетикэдэ ябажа, ехэшүүлэй хоёрдохи разрядтай.
«Краса России» гэһэн бүхэроссиин мүрысөөн 1995 ондо анха түрүүшынхиеээ үнгэргэдэжэ, тэрэнэй удаа жэл бүри эмхидхэгдэнэ. Энэ мүрысөөн ажаһуугшадай дунда олондо мэдээжэ, басагад тэрэндэ хабаадахаяа хүсэдэг.
