695
Буряад Уласай Толгойлогшо Алексей Цыденов Ивалга аймагаар албанай хэрэгүүдэр ябахадаа, Иволгинск, Сотниково, Поселье болон Хойто-Бэе нютагуудай ажаһуугшадтай уулзаһан байна.
Поселье һууринда амбулатори нээлгын баяр ёһололой удаа уласай хүтэлбэрилэгшэ ажаһуугшадтай уулзаа. Энэ уулзалгада ажаһуугшадай һанаа зобооһон асуудалнуудай нэгэн хадаа Советская гудамжын харгы болоно. Тус харгы байгша ондо «Аюулгүй, һайн шанартай харгынууд» гэһэн федеральна түсэлэй хэмжээндэ заһабарилагдаха юм. Ивалга аймагта харгы заһабарилгада 2018 ондо 108 сая түхэриг гаргашалагдаха гэжэ түсэблэгдэнхэй.
Хойто-Бэе нютагта соёлой-тамирай шэнэ түбтэ уулзалга эмхидхэгдэһэн байна. Уулзалгын үедэ харгы, ууха уһанай шанар, һургуули барилга гэхэ мэтэ асуудалнуудаар зүбшэн хэлсэһэн байна. Хойто-Бэеһээ федеральна харгы хүрэтэр ошохо 860 метр утатай харгы 2019 ондо заһабарилагдаха. Энэл жэлдэ нютагта худаг бариха түсэбтэй. 2021 ондо Буряад Уласай «Болбосорол болон эрдэм ухаа хүгжөөлгэ» гэһэн гүрэнэй прогаммын хэмжээндэ Доодо Ивалга, Хойто-Бэе нютагуудые холбоһон газарта 350 һууритай һургуули бариха түсэбтэй.
Иволгинск һууринда уласай хүтэлбэрилэгшэ хоёр уулзалгануудые эмхидхэһэн байна. Тамирай-элүүржүүлгын байшанда Алексей Цыденов залуушуултай уулзаа. Ивалга аймагай Соёлой байшанда ажаһуугшадтай уулзалга эмхидхэгдэһэн байна. Энэ уулзалгада Халюутын уһалууриин һужаагай һэльбэн шэнэдхэлгэ болон Халюута голдо уһа хадагалха сөөрэмэй барилга тухай зүбшэн хэлсэбэ. Барилга хэхэ ажалда 462 сая түхэриг хэрэгтэй. Мүнөө энэ түсэл 2021-2025 онуудта “Ородой Холбоото Уласай хүдөө ажахын газарнуудые һайжаруулга хүгжөөлгэ” гэһэн программада оруулхаар федеральна мэдэлэй ехэ заһабарилга хэгдэхэ обьектнүүдэй тобьёгто оруулагдаа.
Тиихэдэ «Ургаса» гэһэн дачын эблэлдэ баригдаһан гэрнүүдые дансатай болгохо талаар хэлсэгдээ. Энэ газар федеральна мэдэлдэ байбашье, Буряадай гүрэнэй хүдөө ажахын ехэ һургуулида болзоргүй ашаглалгада дамжуулагданхай.Мүнөө эдэ газарнуудые Гүрэльбын һомоной мэдэлэй болгохо талаар хэлсэгдэнэ. Ажаһуугшадай хандалгануудаар Сужа, Нур-Селени нютагуудта автобусай тогтохо нэмэлтэ буудалнуудые барилгада мүнгэ һомолхо тухай Харгын федеральна агентствэтэй хэлсэгдэнэ. Сотниково һууринда эдихэ, ууха уһанай шанар, тэрэниие хүнүүдэй һаадгүй абаха асуудалнуудые ажаһуугшад табиһан байна. Энэ асуудал шиидхэхэ талааар худаг малтаха түсэбтэй. Тиихэдэ ажаһуугшадые шэрэхэ транспортын талаар асуудалнууд хэлсэгдээ. 129 дүгээр маршрудай түлөөлэгшэдтэй хүнүүдэй ажалдаа ошохо, бусаха сагта нэмэлтэ автобус табиха тухай Буряад Уласай Транспортын сайдта хэлсэхэ даабари үгтэбэ. Залуушуулай сүлөө сагаа үнгэргэхэ асуудал ажаһуугшад табиһан байна. Байгша ондо тус һууринда тамирай талмай болон барилдаанай үргөө хубиин мүнгэ һомололгоор бариха түсэбтэй.
«Ивалга аймаг хото шадар оршодог онсо шэнжэтэ. Улаан-Үдэһөө хол бэшэ хадань, Ивалга аймаг уласай бүхы аймагууудһаа зон зөөжэ ерэнэ. Ажаһуугшадай тоо хангалгын байгууламжын хүгжэлтэһөө түргөөр олошорно. Тиимэһээ олон асуудалнууд гаража, тэдэниие шиидхэхэ хэрэгтэй», - гэжэ уласай хүтэлбэрилэгшэ ажаһуугшадтай уулзалгада хэлэһэн байна.
Буряал Уласай Толгойлогшо Алексей Цыденовэй хэлэһээр, Ивалга аймаагй ажаһуугшадай асуудалнуудта онсо анхарал хандуулагдана. Байгша ондо Поселье, Гүрэльбэ һууринуудта хоёр һургуули баригдаха гэжэ уласай хүтэлбэрилэгшэ хэлэбэ.
Буряад Уласай Засагай газарай хэблэлэй албанай гэрэл зураг
