1117
Февралиин 6-һаа эхилжэ, Улаан-Үдэ хотын 15 дугаар “Һолонго” сэсэрлигтэ Сагаалганда зорюулагдаһан хэмжээ ябуулганууд олоор үнгэргэгдэбэ.
Ургажа ябаһан бишыхан хүүгэдые буряад арадайнгаа ёһо заншалнуудтай танилсуулха гэһэн гол зорилго Сагаалганай найрта зорюулһан наадануудта табигдаһан байна. Энэ хэмжээ ябуулгануудта үхибүүд, түрэлхид, хүмүүжүүлэгшэд – булта хабаадажа, бэлиг шадабарияа харуулаа.
“Юун? Хаана? Хэзээ?” гэһэн викторина-наадан ехэ һонирхолтойгоор үнгэрөө гэжэ тэмдэглэлтэй. Эндэ үхибүүд Сагаалган тухай асуудалнуудаар видеобуулгабари хэжэ, аба эжынэртэеэ наадаһан байна. Энэ нааданда түрэлхид түрүүлжэ, һонирхолтой мүрысөөн болобо гэжэ тэмдэглээ.
“Аба, эжы, би - тамирта дуратайбди!!!” гэһэн бэеын тамирай мүрысөөн олон гэр бүлэнүүдые суглуулаа. Хабаадагшад олимпиин тамиршадһаа дутуугүй һанаа үнөөндэ атбтажа, мүрысөөндэ шармайн хабаадаа гэхэдэ алдуу болохогүй. Эдэнэр булта солбон, хүнгэн, түргэн, шуран, шамбай байһанаа харуулаа. Ту мүрысөөндэ Аюрзан Гунгаров аба эжытэеэ түрүүшын һуури эзэлээ.
“Манай амтатай эдеэн. Амсагты! Абагты!” гэһэн эдеэнэй ярмаркада буряад арадай эдеэ хоол элбэгээр дэлгэбэ. Сэсэрлигэй бүлгэм бүхэн шэрээгээр дүүрэн сагаалганай эдеэ хоол бэлдэжэ, тэрээн тухайгаа хөөрэжэ үгөө. Эндэшье баһа түрүүлһэн бүлгэмүүд олон байгаа. Сугларһан түрэлхиднай сагаан эдеэгээ дэлгэжэ, сэдьхэлэй баяр хүргөө.
Удаадахи хэмжээ ябуулгада шүлэг уран һайханаар уншагшадай конкурс болоно. “Үбэлэй һайхан сагта дуратайб!” гэһэн сэдэбээр шүлэгүүдые хүүгэд уранаар уншаба. Үхибүүд оролдосотойгоор шүлэгүүдые сээжэлдэжэ, бэлиг талаангаа харуулаа. Удаань иимэ хэмжээ ябуулга үнгэргэгдэжэ байха ёһотой гэжэ дүн гаргагдаһан байна.
Февралиин 28-да “Һолонго” сэсэрлиг Улаан-Үдын Советскэ аймагта “Эдир Гэсэр, Эдир Дангина - 2018” гэһэн конкурс үнгэргэбэ. Энэ хэмжээ ябуулга ехэ харюусалгатай байгаа. 9 сэсэрлигүүдэй 18 энэрхы эдирхэн басагад, эрэлхэг эдир хүбүүд сүгларжа, хүндэтэ нэрэ зэргэнүүдтэ хүртэхэ гэжэ зориг шадалаа, бэлиг талаангаа харуулһан байна. Нээрээшье, ургажа ябаа Абайхан Гэсэрнүүд, Арюухан Гоохонууд Буряадтамнай олон. Жюриин түрүүлэгшэ Ханда Цыденовагай хэлэһээр, бүхы хабаадагшадта Гран-При шан барюулхаар. Энэ хэмжээ ябуулгада үхибүүдй, хүмүүжүүлэгшэд, түрэлхид ехэ оролдосотойгоор бэлдээ гэжэ тэмдэглэхэ хэрэгтэй. Тиигэбэшье 2018 оной “Эдир Гэсэр” гэһэн нэрэ зэргэдэ 35 дугаар сэсэрлигэй Виктор Ангаткин хүртэбэ. 2018 оной “Эдир Дангина” 15 дугаар сэсэрлигэй Адиса Дампилова болобо.
Адиса басагамнай буряад хэлэеэ мэдэхэ, уг гарбалаа хөөрэжэ, түрэһэн нютагаа магтажа, обог нэрэеэ нэрлэжэ, олондо бэеэ танюулаа. Хатархашье дуратай, хонгёо хоолойгоошье ханхинуулха бэрхэ басаган бэлиг талаангаа дүүрэн харуулаа. Үнгэргэгдэһэн хэмжээ ябуулгануудай дүнгүүдээр, бэрхэ хүбүүд, басагад ургажал ябана гэжэ мэдэрхэдэ ехэ урматай.
Сэсэгма БУДАИН, 15 дугаар «Һолонго» сэсэрлигэй буряад хэлэнэй багша
«Һолонго» сэсэрлигэй гэрэл зураг
