839
Буряад Уласай Засагай газарта Федерациин Зүблэлэй ниигэмэй бодолгын талаар хорооной Тамир болон спортын талаар мэргэжэлтэ шүүбэриин зүблэлэй суглаан «Тамирай үбэлэй наадануудай хүгжэлтэ» гэһэн сэдэбээр мүнөөдэр үнгэргэгдэбэ.
Эндэ сугларһан мэргэжэлтэ шүүбэришэдэй һанамжаар, Буряад Уласта үбэлэй наадануудые хүгжөөлгэдэ уларил болон уласай газар зүйн байдал тон тааруу. Санаар урилдаан, слалом, биатлон, сноуборд гэхэ мэтые хүгжөөлгэ тухай суглаанда хэлэгдэбэ.
Буряад Уласай Толгойлогшо Алексей Цыденовэй хэлээһэр, Байгалай урда бэеын уларил һорилго, мүрысөөнүүдые үнгэргэхэдэ тааруу. Үбэлэй хаһа зургаан һарада үргэлжэлнэ. Байгалай хадануудһаа санаар һолжорхо харгынуудые татахаар. Буряад Уласта Олимпиин наадануудта тамиршадай бэлэдхэл гараха түб байгуулха арга боломжонууд бии. 2022 ондо Пекин хотодо үнгэргэгдэхэ Олимпиин үбэлэй наадануудые угтуулан, Буряад Уласта тамиршадай бэлэдхэл гараха түб байгуулбал зохихо.
«Иимэ хэмжээ ябуулгын Буряадта үнгэргэгдэхэдэнь, ехэ баяртайб. Пхенчхан хотодо үнгэргэгдэһэн Олимпиин наадануудта Алиса Жамбаловагай хабаадахада, Буряад уласай ажаһуугшад нютагайнгаа басаганай амжалтануудта баясажа байгаа. Тамирай үбэлэй наадануудай Буряадта хүгжөөхэ арага боломжонууд бии», - гэжэ уласай хүтэлбэрилэгшэ тэмдэглэбэ.
Буряад Уласай спортын болон залуушуулай бодолгын талаар сайд Вячеслав Дамдинцуруновай хэлэһээр, улас дотор спорт хүгжөөхэ шухала зорилгонуудай нэгэн хадаа 2020 он болотор үбэлэй наадануудаар тамирай һургуулинуудта хүмүүжэмэлнүүдые олоор хабаадуулха. Тиимэһээ Буряад Уласта тамирай хангалгын байгууламжа хүгжөөхэ гэжэ түсэблэгдэнэ.
«Мүнөө Буряадта санаар ябалгын 18 бааза, биатлоной нэгэ комплекс, наадануудай 54 талмай ажалаа ябуулдаг. Гүрэнэй-хубиин олзын хэрэг эрхилэгшэдэй талаһаа ажал ябуулагдажа, Улаан-Үдэдэ Мүльһэнэй ордон барихаар түсэблэгдэнэ. Тиихэдэ мүнгэ зөөри оруулалгын түсэлнүүд бэлдэгдэжэ, тэдэниие бэелүүлхэдэ аша үрэтэй гэжэ сайд тэмдэглэбэ.
Буряад Улас бүхэроссиин тамирай хэмжээ ябуулгануудта эдэбхитэй хабаададаг, нэрлэбэл, «Лыжня России», санаар урилдаашадай дунда Байгалай марафон, «Байкальская рыбалка» болон аймагуудта хүдөөгэй үбэлэй нааданууд үнгэргэгдэдэг. Тиибэшье улас дотор тамирай үбэлэй наадануудта һургаха мэргэжэнги һоригшод дуталдана. Буряад Уласай санаар урилдаанай федерациин хүтэлбэрилэгшэ Баир Доржиевэй хэлэһээр, үбэлэй наааднуудые хүгжөөхэ гэбэл, эдэ наадануудта һургаха һоригшодые олон болгохо шухала. Тиихэдэ залуу халаан бэлдэхэ талаар һэльбэн шэнэдхэлгэ үнгэргэхэ, тамирай хангалгын байгууламжа хүгжөөхэ, гүрэнэй бэшэ олониитын эдэбхи үүсхэл дэмжэхэ хэрэгтэй.
