Улаан-Үдэдэ шэнэ амбулатори нээгдэбэ

Улаан-Үдэ хотын Мелькомбинат микрорайондо 5 дугаар поликлиникын амбулатори нээгдэбэ. Тэрэнэй барилгада 32 сая түхэриг һомологдоһон байна. Шэнэ амбулаторида 10,2 мянган ажаһуугшадта эмнэлгын туһа хүргэгдэхэ. Энээнһээ урид ажаһуугшад түмэр харгы хүндэлэн гаража, поликлиника ошодог һэн.

Буряад Уласай Засагай газар болон Арадай Хурал амбулаториин орохо байшан худалдажа абалгада 22 сая түхэриг, тэрэниие заһабарилгада – 7,5 сая түхэриг болон эмнэлгын хэрэгсэлнүүдые абалгада 2,5 сая түхэриг һомолһон байна гэжэ элүүрые хамгаалгын сайд Дамбинима Самбуев хэлэбэ. Тэрэнэй хэлэһээр, Буряад Уласта элүүрые хамгаалгын һалбари хүгжөөлгэдэ ехэ ажал хэгдэбэ.

- Амбулаторидо ажалаа ябуулхаар бэлэн. Эндэ 10200 ажаһуугшадта эмнэлгын туһа хүргэгдэхэ, - гэжэ Дамбинима Самбуев хэлэбэ.

1929 ондо энэ микрорайондо амбулатори нээгдэжэ, ажаһуугшадта эмнэлгын туһа хүргэжэ эхилһэн юм гэжэ хотын 5 дугаар поликлиникын ахамад эмшэн Людмила Мансорунова хэлэбэ.

Улаан-Үдэ хотын 5 дугаар поликлиникэ хадаа улас дотор эгээл түрүүн нээгдэһэн эмнэлгын эмхинүүдэй нэгэн юм. Мүнөө энэ поликлиникэдэ ниислэл хотын Южный, Таёжный, 148 квартал, Тальцы микрорайонуудай, Сосновый бор, Звёздный, Мелькомбинат болон Мясокомбинат һууринуудай 36 мянган ажаһуугшадта эмнэлгын туһа хүргэгдэдэг. 1993 ондо нээгдэһэн эмнэлгын эмхидэ хүүгэдэй болон томошуулай поликлиникэнүүд, 45 һууритай стационар, Звёздный, Сосновый бор, Тальцы һууринуудта болон 148 кварталда амбулаторинууд бии.

Олон жэлэй туршада хүлеэгдэһэн поликлиникын нээгдэхэдэ, эмшэд болон ажаһуугшадай баяртай байһаниинь эли харагдажа байгаа.

- Поликлиникын нээгдэһэндэ угаа баяртайб. Би энэ аймагта ажаһуудагби, тиигээд гансал үбшэлхэдөө бэшэ, харин нүхэдтөө ерэжэ байхаб. Үшөө Улаан-Үдэ хотын зүблэлэй һунгамал ябаха үедэм, Мелькомбинадта поликлиникэ бариха гэһэн захяа ороһон юм, - гэжэ Арадай Хуралай һунгамал Сергей Бужинаев хэлэбэ.

Буряад Уласай Арадай Хуралай һунгамалнууд: Лариса Крутиян болон Сергей Бужинаев

Сергей Бужинаев поликлиникын шэнэ байшанда ашаглалгада тушаахын түлөө ямар ажал хэгдээб гэжэ хөөрэбэ. Тиихэдэ поликлиникын газаа болбосон түхэлтэй болгохо талаар туһа хүргэхэ тухайгаа мэдүүлээ. Һунгамалай хэлэһээр, хүүгэдэй поликлиникада залгалаа байшан баригдаха.