​Буряадай эрхим һурагша – Баргажанһаа

Буряад Уласай байгуулагдаһаар 95 жэлэй ойн баярта зорюулагдаһан “Буряад Уласай эрхим һурагша - 2018” гэһэн арбан гурбадахи урилдаан Улаан-Үдэ хотодо Гүрэнэй хүүгэдэй болон эдиршүүлэй уран бэлигэй ордондо февра­лиин 28-һаа мартын 2 болотор үргэн дэлисэтэйгээр үнгэргэгдэбэ.

Мүнөө жэлэй урилдаанда 28 һурагша эдэбхитэйгээр хаба­адаба. Тэдэ түрэл һургуулиингаа, нютагайнгаа урилдаанда шалгар­жа, уласай хэмжээндэ хаба шада­лаа туршаха эрхэдэ хүртөө юм. Эгээ эрхим, бэлигтэй һурагшадые элирүүлхэ, мүн өөһэд хоорондонь хани харилсаатай, нягта холбоо­той болгохо, болбосоролой тала­ар дүй дүршэлөөрөө хубаалдаха гэһэн зорилго энэ мүрысөөндэ табигдадаг гэжэ һануулая.

Урилдаан дүрбэн шатаһаа бүридөө: дэмжэлгын бүлэгэй хабаадалгатай зохёохы танил­суулга, “Минии ажал - уласай ажал хэрэгүүдтэ нэмэри” гэһэн түсэл хамгаалга, “Калейдоскоп культур” гэһэн ябууд зохёолгын урилдаан, “Амжалтын ёһо дүрим” гэһэн мастер-класс.

Аха ангинуудай һурагшадай урилдаае нэмэлтэ һуралсалай ахамад мэргэжэлтэн Татья­на Батомункуева амаршалгын үгэнүүдээр нээгээ.

“Мүнөө жэл Буряад Ула­саймнай 95 жэлэй ойн баяр тэмдэглэгдэхэһээ гадна нэмэл­тэ һуралсалай 100 жэл мүн лэ гүйсэнэ. Мүнөөдэр бүхы бэлиг шадабаряа харуулжа, һайнаар лэ хабаадахыетнай таанадые уря­алнаб. Илагшад Ородой Холбоо­то Уласай Юрэнхылэгшын шан­да хүртэхэ гэжэ тэмдэглэлтэй. Тиимэһээ эрхимэй эрхим һурагша илажа гараг лэ даа”, - гэжэ Татья­на Пурбоевна хэлэбэ.

Нэмэлтэ тусхай һуралсалай таһаг даагша Доржи Фролов эрил­тэ ехэтэй жюриин түрүүлэгшэ байгаа. Мүрысөөн бүхэн ехэдэ­эл һаа табан баллаар сэгнэгдээ. Һурагшадай наадаяа харуулһанай удаа жюриин гэшүүд шууд сэгнэлтэнүүдые табин хэлэжэ байгаа. Тэдэнэй ажал тэсэбэри, анхарал ехэтэй гэжэ тэмдэглэмэ­эр. Эды олон һурагшадые бүхы талаһаань сэгнэн хараха гээшэ бэлэн бэшэ, арсалдаата асуудал­нуудшье гаража магадгүй. Харин нэгэл “эрхим һурагша” илажа га­раха ёһотой гэжэ мэдээжэ ха юм.

Урилдаанай түрүүшын шатада “Ганса хүн - хүн бэшэ, ганса сусал - гал бэшэ” гэһэн буряад арадай сэ­сэн үгын ёһоор, һурагшад дэмжэг­шэдэй бүлгэмтэеэ суг хамта ирагуу найруулгаар гү, гоё һайхан хатара­ар гү түрэл тоонто нютагаа магтан, туйлаһан амжалтанууд тухайгаа хөөрөө. Адаглажа байхада, мүнөө үеын үхибүүд юумэнһээ сошоод орхихогүй, тайзан дээрэ эшэлтэгүй бэеэ харуулна. Бүгэдэ дүрбэн тэг­шэ бэрхэнүүд байна: хатаржашье, дуулажашье, уран гоёор хэлэжэ­шье шадана, һуралсалдаашье ам­жалтатай.

Дүн гаргаха саг дүтэлжэ, хаба­адагшад һанаата болоод байба. Гэбэшье һурагшад бэе бэеэ дэм­жэн байжа, ехэ эбтэйгээр жюриин шиидхэбэри хүлеэбэ.

Тиин гурбадахи һуури Аха ай­магай һургуулиин Доржо Прон­теев болон Улаан-Үдэ хотын 32 дугаар һургуулиин Мария Дарбашкеева эзэлээ. Хоёрдохи һууриие Хяагта аймагай Вячес­лав Чагдуров болон Сэлэнгэ ай­магай Гусиноозёрск хотын Софья Попова хоёр мүн лэ хубаалдаба. Нэгэдэхи һуурида хэбэд номхон Хэжэнгэ нютагай В.С.Мункинай нэрэмжэтэ лицейн 11-дэхи ан­гиин һурагша Дэнзэн Базаров гараа. Харин “Буряад Уласай эр­хим һурагша- 2018” гэһэн нэрэ зэргэдэ Баргажан аймагай 11-дэхи анги­ин баатар хүбүүн Антон Стельма­шенко хүртэбэ.

“Илажа гарахын тула тэсэмгэй удаанаар бэлэдхэл хээбди. Багша­нартаяа суг хамта илахал гэжэ зо­рилго табиһан байнабди. Үнэн дэ­эрээ, иимэ бэрхэ, шадабари ехэтэй хабаадагшадтай тулалдаһандаа баяртайб. Энэ мүрысөөндэ олон нүхэдтэй болооб”, - гэжэ 2018 оной эрхим һурагша баяраараа хубаалдаба. 

Авторай гэрэл зураг