891
Ородой Холбоото Уласай Юрэнхылэгшын грант бэелүүлхэ талаар «Оршон тойронхи байгаали болон амитадые хамгаалга» гэһэн һалбарида хэгдэхэ ажалай хоёрдохи шата Буряадта эхилбэ. Март һарын һүүл багаар олониитын эмхинүүдэй «Добровольческий корпус Байкала» болон «Большая Байкальская тропа - Бурятия» эблэлэй байгаали хамгаалгын түсэлнүүд Буряадта түймэр һэргылхэ хэмжээ ябуулганууд болон экологиин зам болбосон түхэлтэй болгохо талаар ажал эрхилхэ.
Буряадта ойн түймэр һэргылхэ болон байгаали хамгаалгын аяншалга хүгжөөхэ талаар хэмжээ ябуулгануудые эмхидхэлгэдэ олониитын эмхинүүдтэ юрэнхылэгшын грантаар табан саяһаа дээшэ түхэриг һомлогдоһон байна. Тиихэдэ түсэлнүүдые бэелүүлхэ талаар хэрэгсэлнүүд абтажа, уласай онсо шухаг байгаали аршалха зорилготой һайн дураараа туһа хүргэгшэдые эмхидхэхэ талаар ажал ябуулагдана
- Ойн түймэрнүүдые һэргылхэ, сараха, һайн дуратаниие һургаха, аяншалагшадай олоор ябадаг газарнуудта байгаали хамгаалгын харгы зам байгуулха гэжэ акциин хэмжээндэ хараалагдана. Буряад Уласай аймагуудта экологиин харгы зам болбосон түхэлтэй болгохо талаар ажалай долоон лагерь эмхидхэгдэхэ. Һэргылэмжын болон туршалгын хэмжээ ябуулганууд хээрэ таладаа 2018 оной инь һараһаа август болотор үнгэргэдэхэ. Апрель һарада Улаан-Үдэдэ болбосоролой программанууд эмхидхэгдэхэ юм, - «Добровольческий корпус Байкала» гэһэн эмхиин командир Андрей Бородин хэлэбэ.
Байгша оной август һарада Сибириин федеральна тойрогто түмэр сарадаг дружинануудай хуралдаан үнгэргэгдэхэ. Хуралдаанай үедэ мэргэжэлэй стандартаар һуралсал, худалдаа наймаанай бэшэ эмхинүүдтэй, олондо мэдээсэл тараадаг хэрэгсэлнүүдтэй болон интернет сүлжээндэ яажа ажал ябуулха тухай эрдэм мэдэсэтэй болохо аргатай.
Апрель һарын эхин багаар Улаан-Үдэд аюулгүй байдал сахиха талаар багшанарай болон нэмэлтэ һуралсалай багшанарай семинар эмхидхэгдэхэ. Түймэр һэргылхэ талаар хэмжээ ябуулгануудта залуушуулые, үхибүүдые болон бусад зониие эдэбхитэй хабаадуулха зорилготой семинар үнгэргэгдэхэ.
«Большая Байкальская тропа - Бурятия» эблэлэй хүтэлбэрилэгшэ Андрей Сукневай хэлэһээр, иимэ хэмжээ ябуулганууд һайн дуратанай үүсхэлээр эмхидхэгдэдэг байгаа. Теэд Ородой Холбоото Уласай Юрэнхылэгшын грантнуудай ашаар энэ ажал ондоо хэмжээндэ үнгэргэгдэхэ.
- Байгалай эрье болбосон түхэлтэй болгохо арга байна. Энэ талаар Эрхүү можо түрүүлэн ябана. Мүнөө хүн бүхэн Байгал далай сахиха, аршалха хэрэгтэ хабаадаха аргатай. Тиимэһээ энэ түсэл бэелүүлэгдэнэ. Үхибүүдтэ бага балшар наһанһаа оршон тойрон байгаалидаа, түрэл дайдадаа дурлал түрүүлхэ - манай зорилго, - гэжэ Андрей Сукнев тэмдэглэбэ.
Семинарнуудай үедэ ажалай лагерь эмхидхэхэ талаар залуу бригадир болон менеджернүүдые һургаха, тииъхэдэ түймэр сараха, һэргылхэ талаар залуушуул эрдэм мэдэсэтэй болохо юм. Эдэ бүхы хэмжээ ябуулганууд Ородой Холбоото Уласай Юрэнхылэгшэ Владимир Путинай «Год добровольца - 2018» гэһэн хэмжээндэ эмхидхэгдэнэ гэжэ тэмдэглэлтэй.
