868
Жэл бүри март һарын гурбадахи долоон хоногто үнгэргэгдэдэг «Инклюзиин долоон хоног» гэһэн Бүхэроссиин акцида Буряад Улас дахинаа хабаадаха.
Долоон хоногой туршада «Һаадгүй оршонтой ниигэм» гэһэн уласай олониитын эмхи һайн шанартай болбосорол абахын тула эрэмдэг бэетэй үхибүүдэй ушардаг асуудалнуудта засаг зургаанай болон олониитын анхарал хандуулха зорилготой хэмжээ ябуулгануудые үнгэргэхэ юм.
Ородой Холбоото Уласай 16 можо нютагуудай түлөөлэгшэд, болбосоролой эмхинүүдэй багшанар, нигүүлэсхы сэдьхэлтэй хүнүүд инклюзиин фестивальда уригданхай.
- Түрүүшын үдэр квест үнгэргэгдэхэ. Эндэ эрэмдэг бэетэй зондо хандаса хубилгаха зорилготой эрэмдэг бэетэй зон тухай асуудалнууд табигдаха. Бүхы хабаадагшадта мастер-классууд эмхидхэгдэхэ, - гэжэ «Һаадгүй оршонтой ниигэм» гэһэн уласай жасын түрүүлэгшэ Галина Горбатых хэлэбэ.
Тиихэдэ хотын болон хүдөөгэй һургуулинуудай шабинар Эржена Будаевагай нэрэмжэтэ эрэмдэг бэетэй зоной тусхай гэртэй танилсаха. Буряадай Олониитын танхимай дэмжэлгээр эмхидхэгдэһэн инклюзиин һалбариин эрхим ажалнууд долоон хоногто харуулагдаха. Мүнөө инклюзиин фестивальда хабаадаха тухай арбанһаа дээшэ мэдүүлгэнүүд оронхой, конкурсын дүнгүүдээр эрхим гурбан ажал шэлэгдэжэ, тэдэн бүхэроссиин фестивальда уласаа түлөөлхэ юм.
Эрэмдэг бэетэй үхибүүдэй һурадаг хотын һургуулинуудта баһал хэмжээ ябуулганууд үнгэргэгдэхөөр түсэблэгдэнхэй. Уласай шатын инклюзиин фестивальда илагшадые шагналгын баяр ёһолол мартын 19-дэ Аймакс кинозалда үнгэргэгдэхэ юм. Мүрысөөндэ хабаадагшадай ажалнуудтай www.inclusion24.ru сайтда орожо танилсаха арга бии.
