695
Буряад Уласай Засагай газар һургуулинуудай барилгада мүнгэ һомологшодтой хэлсэжэ, гүрэнэй-хубиин хабаадалгайтай барилга ябуулха юм.
2017 ондо федеральна һанһаа 380 саяһаа дээшэ мүнгэн һомологдожо, юрэнхы болбосоролой 28 эмхинүүдтэ заһабари хэгдэжэ, 63 дугаар һургуулида 40 сая түхэригэй хэрэгсэлнүүд абтаа. Тиихэдэ уласай бюджедһээ мүнгэн һомологдожо, Ивалгын 2-дугаар һургуулида заһабарилга хэгдээ юм. Үнгэрһэн жэлэй туршада Буряад Уласта һургуулинуудые заһабарилгада 415 саяһаа дээшэ түхэриг гаргашалгадаһан байна.
Кадедүүдэй һургуули-интернат
Кадедүүдэй һургуулида хамтын байрада заһабари хэгдээ, хана, оёор заһабарилагадажа, гэрэлтүүлгын талаар ажал хэгдээ, үүдэнүүд һэлгэгдэжэ, түймэрэй гараһан тухай дуулгаха дохёо табигдаа. Эдэ ажалнуудта 9 саяһаа дээшэ мүнгэн һомологдоо. Энэ һургуулида 355 үхибүүд һурадаг, тиимэһээ һурагшад зохид, таатай байдалда ном шудалхын хажуугаар кружок, секцинүүдтэ ябажа, Ородой Холбоото Уласай зэбсэгтэ хүсэнүүдтэ алба гарахаар бэлэдхэл хэдэг юм.
- Үхибүүд зохид байдалтай оршондо байрладаг. Хамтын байрада үхибүүдэй хоёр-гурбаараа байрлаха таһалганууд бии. Ахалагша классуудай һурагшад сэрэгэй албанай байдалда бэлэдхэл гарана, - гэжэ Буряад Уласай болбосоролой болон эрдэм ухаанай сайдай нэгэдэхи орлогшо Галина Фомицкая хэлэбэ.
Уласай бүхы шахуу аймагуудай үхибүүд кадедүүдэй һургуулида 5-дахиһаа 11-дэхи класс хүрэтэр һурадаг. Дүшэн жэлэй саана баригдаһан байшанда нэгэшье ехэ заһабари хэгдээгүй байгаа.
Буряадай үндэһэтэнэй 1 дүгээр лицей-интернат
Үндэһэтэнэй лицейдэ баһал заһабарилгын ехэ ажал хэгдэһэн байна. Һургуули болон хамтын байрада хушалта шэнэлэгдэжэ, эдеэ хоол бэлдэдэг газарт мүнөө үеын эрилтэнүүдтэ тааруу болгогдоо. Тиихэдэ барилдаанай залда заһабарилга хэгдээ. Эдэ ажалнуудта федеральна болон уласай һанһаа 10 сая түхэриг һомлогдоо юм.
- Түрүүлэн заһабари хэгдэхэ һургуулинуудые шэлэжэ, заһабари хэгдэбэ. Эндэ ганса хотын һургуулинууд бэшэ, харин хүдөөгэй эрдэмэй гуламтанууд заһабарилагдаа. Хойто жэлдэ һургуулинуудта заһабарилгын ажалнууд үргэлжэлүүлэгдэхэ, мүнөө тэдэ һургуулинууд бүридхэлдэ оруулагдана, - гэжэ Галина Фомицкая тэмдэглээ.
Болбосоролой эмхи зургаанай захирал Булат Шойнжоновой хэлэһээр, һургуули мүнөө үеын эрилтэнүүдтэ тааруу болоо.
14 дүгээр гимназиин шэнэ байшан
Байгша ондо 14 дүгээр гимназида ахалагша классуудай һурагшадай һураха, 312 һууритай шэнэ байшан баригдаа. Үхибүүд нэгэ халаанда һуража, хэшээлэй һүүлдэ кружок, секцинүүдтэ ябаха аргатай болобо. Һургуулиин шэнэ байшан ашаглалгада тушаагдаашье һаа, шиидхэхэ асуудалнууд олон. Һуралсалай шэнэ жэлдэ һурагшадые угтан абаха гэбэл, һуралсалай хэрэгсэлнүүдые абалгада үшөө 25 са түхэриг хэрэгтэй. Энэ асуудал болбосоролой болон эрдэм ухаанай яаман хотын захиргаантай хамта хиналта доро абанхай.
Барилгын ажалда 41 сая түхэриг һомологдоһон байха юм. 750 һуралсалай һууритай эрдэмэй гуламтада 2 мянганһаа дээшэ үхибүүд һурадаг юм. Улаан-Үдэ хотын болбосоролой талаар хорооной түрүүлэгшэ Ульяна Афанасьевагай хэлэһээр, һургуулида нэгэ класста 34-36 һурагшад һурадаг, тиимэһээ иимэ байдалда һурагшад болон багшанарташье ехэ хүндэ.
- Гол байшанһаа холо бэшэ оршодог шэнэ байшанда ахамад классууд һураха. Гимназиин олон һурагшад хотын хороонуудһаа ябажа һурана. Тиимэһээ шэнэ байшанда үхибүүд эрдэм олохоһоо гадуур, нэмэлтэ һуралсалай хэшээлнүүдтэ болон гүрэнэй шалгалтануудта бэлдэхэ аргатай болобо, - гэжэ Ульяна Афанасьева тэмдэглэбэ.
Һургуулинуудай барилга болон заһабарилга үргэлжэлүүлэгдэхэ
«2015 он болотор Ородой Холбоото Уласай можо нютагуудта болбосоролой эмхинүүдтэ һуралсалай һууринуудые байгуулга дэмжэлгэ» гэһэн федеральна программа бэелүүлжэ, 2018 ондо 112-дохи кварталда 744 һууритай һургуулиин баридаг үргэлжэлүүлэгдэжэ, жэлэй дүүрэтэр ашаглалгадай тушаагдаха гэжэ түсэблэгдэнэ. Тиихэдэ байгша ондо Ивалга аймагай Гүрэльбэ һууринда 450 һууритай һургуулиин барилга үргэлжэлүүлэгдэжэ, 2019 оной январь һарада ашаглалгадай тушаагдаха гэжэ түсэблэгдэнхэй. 2018 оной уласай бюджедтэ һургуулинуудта заһабарилгын ажалнуудта 170 сая түхэриг хараалагданхай.
Мэдээсэл: 2018 ондо барилга эхилхэ болбосоролой эмхинүүдэй тобьёг:
- 33 дугаар һургуулида 216 һуралсалай һууритай залгалаа байшан;
- 25 дугаар һургуулида 250 һууритай шэнэ байшан;
- Улаан-Үдын зүүн бэедэ 1275 һууритай һургуули;
- Ивалга аймагай Поселье һууринда 450 һууритай һургуули;
- Тарбагатай аймагай Доодо Саянтада 450 һууритай һургуули;
- Сэлэнгэ аймагай Новоселенгинск һууринда 176 һууритай һургуули;
- Кабанск аймагай Клюевка һууринда 100 һууритай һургуули;
- Хурамхаан аймагай Хурамхаанда 275 һууритай һургуули.
