800
Хяагта аймагай Ехэ Хүдэр нютагта фельдшерскэ-акушерскэ пункт нээлгын баяр ёһолол мартын 13-да үнгэрбэ.
Һүүлэй гушан жэлэй туршада Ехэ Хүдэр нютагта шэнээр баригдаһан, ниигэмэй удха шанартай эмхи зургаан түрүшынхиеэ баригдаба гэжэ нютагаархид тэмдэглэнэ. Ехэ Хүдэртэ 800-аад хүн ажаһуудаг. Энээнһээ урид тэдэнэр али үбшэндэ нэрбэгдэхэдээ, часай туршада харгыда ябажа, Хяагтын түбэй больница хүрэдэг һэн.
Ехэ Хүдэртэ эмнэлгын эмхиин нээгдэхэ баяр ёһололдо Буряад Уласай элүүрые хамгаалгын сайдай орлогшо Светлана Замбалова хабаадажа, тус эмхиин даагша Ирина Назимовада эмнэлгын хэрэгсэлнүүдые худалдан абахаар 100 мянган түхэригэй үнэмшэлгэ барюулба. Тиихэдэ Арадай Хуралай һунгамал Евгений Ханхалаев эмхи зургаанда компьютер бэлэглэхэ тухайгаа хэлэбэ. Светлана Замбаловагай хэлэһээр, фельдшерскэ-акушерскэ пунктнуудые интернет холбоотой болгохо талаар асуудалнууд шиидхэгдэхэ. Мүнөө дээрэ амбулаторинууд сүлжээ холбоотой болгогдоно.
«Ородой Холбоото Уласай Элүүрые хамгаалгын яаманай түсэбөөр, анхан сүлжээ холбоогүй байһан эмнэлгын 160-аад эмхи зургаанууд хурдан интернедтэй болохо. Эндэ аймагуудай больницануудай амбулаторинууд тухай хэлэгдэнэ. Үнгэрһэн жэлдэ 124 эмхи зургаанууд интернет холбоотой болоһон байна, байгша ондо дүшөөд эмхинүүд сүлжээ холбоондо хамжагдаха. Фельдшерскэ-акушерска пунтнуудта интернет холбоо байгуулха талаар асуудал үшөө шиидхэгдэхэ. Оптоволоконно холбоотой нютагуудта, жэшээнь Сэлэнгэ аймагта, фельдшерскэ-акушерскэ пунктнууд интернет холбоотой юм», – гэжэ сайдай орлогшо Светлана Замбалова хэлэбэ.
Ехэ Хүдэр нютагта эмнэлгын эмхи Буряад Уласай «Элүүрые хамгаалгын һалбари хүгжөөлгэ» гэжэ гүрэнэй программаар 2017 ондо баригдаа. Барилга болон хангалгада 7 сая түхэриг һомологдоһон байна.
«Жэлэй эхилһээр Буряад Уласта 11-дэхи эмшэлэлгын эмхи нээгдэбэ. 2018 ондо долоон фельдшерскэ-акушерскэ пункт, хоёр амбулатори болон хабдартай үбшэнэй диспансерай барилга дүүргэхэ түсэбтэйбди. Һаяын үдэрнүүдтэ Ородой Холбоото Уласай Засагай газарта 100-һаа доошо ажаһуугшадтай, эмшэлэлгын таһаг, фельдшерскэ-акушерскэ пункт үгы Буряадай нютагуудта модульна технологёор барилга хэхэ гэжэ 19 сая түхэриг һомолхо тухай тогтоол абтаһан байна. Энэ хадаа Кабанск аймагай Горный, Баргажанай Уржил, Хурумхаанай Тодогто болон Ивалга аймагай Ключи һууринууд болоно», –гэжэ элүүрые хамгаалгын сайдай орлогшо хэлэбэ.
Буряад Уласай элүүрые хамгаалгын яаманай хэблэлэй албанай гэрэл зураг
