​Буряад Уласта һунгалта сагһаа урид яажа үнгэрнэб?

Һунгуулиин комиссиин гэшүүд малшад болон Захаамин аймагай засаг даргын 1-дэхи орлогшо Д. Д. Очировтай хамта

Хүдөө нютагуудай олонхи малшад холын буусануудта хэдэн дабаанай саана байдаг. Тиимэһээ ямаршье һунгалтын: нютагай, аймагай зүблэлнүүдтэ болон Арадай Хуралда, Гүрэнэй Дүүмэдэ арадай һунгамалнуудые; сомоной, аймагай захиргаанай дарганарые, Буряад Уласай Толгойлогшые болон Ородой Холбоотой Уласай Юрэнхылэгшые һунгалтын үнгэрхэгдэхэдэ, сагһаа урид һунгаха гурим байдаг.

Мүнөөшье, гүрэн түрынгөө Юрэнхылэгшые һунгаха энэ ехэ удха шанартай һунгалтада булта зониие хабаадуулха зорилготойгоор малшадай холын буусануудаар һунгуулиин комиссиин гэшүүд ажалаа ябуулна.

Манай сурбалжалагша Захаамин аймагай Утаатын нютаг дэбисхэрэй Оронгодойн голдо тэрэ ехэ харюусалгата ажалаа дүүргэжэ ябаһан хэргэмтэ ажалшадтай Хэнзэхэндэ уулзаа.

Утаатын нютаг дэбисхэрэй һунгуулиин комиссиин гэшүүд: Гэрэлма Анатольевна Санжижапова Валентина Санжиевна Дымбрылова хоёр Валерий Жамьянович Базаров жолоошотоёо хүдөөгэй холын малшадые һунгуулжа ябаба.

Мартын 14-дэ тэдэнэр Дээдэ, Доодо-Адагууд нютагуудаар хара үглөөнһөө ябажа, малшад һунгаһан байна. Тиигээд Оронгодойн Хэнзэхэндэ ерэжэ, үшөө 8 хүниие һунгуулха даабарияа дүүргэбэбди гэжэ хөөрэбэ.

Тиихэдэ тэдэнэр Оронгодойн гол үгсэжэ, бүхы малшадые һунгалтада хабаадуулха юм. Тудхалтада орожо хоноод, мартын 15-да тэндэ ажаһуудаг наһаа хүсэһэн бүхы һунгагшад юрэнхылэгшын түлөө дуугаа үгэхэ юм.

Сэнгэ Ринчиновэй гэрэл зураг